*हळदीकुंकू निमित्ताने झाडाचे रोप वाटून जपला पर्यावरण रक्षणाचा संदेश*

*बांदा*
हळदीकुंकू हा महिलांच्या स्नेहबंधांचा, आनंदाचा आणि परंपरेचा उत्सव म्हणून मोठ्या उत्साहात साजरा केला जातो. या पारंपरिक सणाला सामाजिक आणि पर्यावरणीय जाणीवेची जोड देत हळदीकुंकू कार्यक्रमाच्या निमित्ताने सावंतवाडी येथील देवसू प्राथमिक शाळेच्या उपक्रमशील शिक्षिका प्रणिता राहूल मांडवकर यांनी उपस्थित महिलांना झाडांची रोपे भेट म्हणून देत पर्यावरण रक्षणाचा संदेश देण्यात आला.
बदलत्या जीवनशैलीत सण-समारंभांमध्ये प्लास्टिकच्या वस्तू, शोभेच्या साहित्याचा वाढता वापर पर्यावरणासाठी घातक ठरत असताना, या उपक्रमातून पर्यावरणपूरक पर्यायाचा आदर्श घालून देण्यात आला. रोपवाटपाच्या माध्यमातून “एक घर – एक झाड” ही संकल्पना मांडण्यात आली.
कार्यक्रमास उपस्थित महिलांनी आनंदाने रोपे स्वीकारली व ती आपल्या घराच्या परिसरात लावून त्यांचे संगोपन करण्याचा संकल्प केला. झाडे लावणे म्हणजे केवळ रोप लावणे नव्हे, तर भविष्यातील पिढ्यांसाठी स्वच्छ हवा, पाणी आणि हिरवळ जपण्याचे कार्य असल्याचा संदेश यावेळी देण्यात आला.
हळदीकुंकूसारख्या पारंपरिक सणातून पर्यावरण संवर्धनाचा विचार पुढे नेल्यामुळे या उपक्रमाचे सर्व स्तरातून कौतुक होत आहे. सण साजरा करताना निसर्गाशी असलेली आपली जबाबदारीही तितक्याच गांभीर्याने जपली पाहिजे, हा विचार या उपक्रमातून प्रभावीपणे मांडण्यात आला.
या उपक्रमामुळे महिलांमध्ये पर्यावरणाबाबत सकारात्मक दृष्टीकोन निर्माण झाला असून सामाजिक सण हे केवळ आनंदाचे नव्हे, तर समाजप्रबोधनाचेही माध्यम ठरू शकते.