प. पू. भालचंद्र महाराजांच्या माघी पायी वारीत लोरे येथे वारकऱ्यांसोबत घेतला भक्तिरसाचा अनुभव

कणकवली :

परमपूज्य भालचंद्र महाराज संस्थान, कणकवली येथून श्री क्षेत्र पंढरपूरकडे निघणारी सिंधुदुर्ग–पंढरपूर माघी पायी वारी गेली २६ वर्षे अखंडपणे सुरू आहे. वैभववाडी मार्गे पंढरपूरकडे जाणाऱ्या या दिंडीचा सोहळा लोरे येथे वारकरी राजू रावराणे यांच्या निवासस्थानी थांबला असता, सिंधुदुर्ग जिल्ह्याचे पालकमंत्री नितेश राणे यांनी दिंडीत सहभागी होत विठ्ठल नामात एकरूप होण्याचा अनुभव घेतला.

वारकऱ्यांच्या भक्तिभावाने व उत्साहाने भारावून गेल्याची भावना व्यक्त करत मंत्री नितेश राणे यांनी विठ्ठलभक्तीत लीन होत दिंडीतील वातावरण अनुभवले. यावेळी विधीवत पूजन व आरती त्यांच्या हस्ते पार पडली.

या भक्तिमय प्रसंगी मंडळाचे अध्यक्ष ह.भ.प. विश्वनाथ गवंडळकर महाराज, ह.भ.प. दीपक मडवी महाराज, गायकवाड महाराज, आपटे महाराज, अंधारी महाराज, देसाई महाराज यांच्यासह माजी सभापती मनोज रावराणे, सरपंच अजय रावराणे, भाजप पदाधिकारी राजू रावराणे, सिद्धेश रावराणे, रितेश मेस्त्री तसेच अन्य मान्यवर व वारकरी उपस्थित होते.

विठ्ठलनामाचा गजर, अभंग-भजनांची गुंज आणि वारकऱ्यांचा उत्साह यामुळे लोरे येथे दिंडी थांबलेला हा क्षण भक्तिभावाने भारलेला ठरला.