*भव्य व आधुनिक इमारतीचे पालकमंत्री नितेश राणे यांच्या हस्ते भूमिपूजन*

*”इमारत प्रत्येक नागरिकासाठी महत्त्वाची; प्रशासन अधिक गतिमान व लोकाभिमुख होणार” – पालकमंत्री नितेश राणे*

सावंतवाडी :

सावंतवाडी येथील उपविभागीय अधिकारी तथा उपविभागीय दंडाधिकारी कार्यालयाच्या नवीन भव्य व सुसज्ज इमारतीचे भूमिपूजन पालकमंत्री नितेश राणे यांच्या हस्ते मोठ्या उत्साहात पार पडले. या प्रसंगी बोलताना त्यांनी, “आजचा दिवस उपविभागातील प्रत्येक नागरिकासाठी ऐतिहासिक आहे. ही इमारत प्रशासन आणि नागरिक यांच्यातील दुवा अधिक मजबूत करेल,” असे स्पष्ट केले.

या इमारतीसाठी महसूल मंत्री चंद्रशेखर बावनकुळे यांनी ४ कोटी ३३ लाख रुपयांचा निधी मंजूर केल्याबद्दल पालकमंत्री नितेश राणे यांनी त्यांचे आभार मानले. ठरलेल्या कालावधीत काम पूर्ण होणे अत्यावश्यक असून, दोन वर्षांच्या ऐवजी एकाच वर्षात काम पूर्ण झाल्यास संबंधित यंत्रणेचा विशेष सत्कार केला जाईल, असेही त्यांनी सांगितले.

नवीन इमारतीतून प्रशासन अधिक पारदर्शक, गतिमान व लोकाभिमुख झाले पाहिजे, यावर भर देताना पालकमंत्री म्हणाले की, नागरिकांना कमीत कमी चकरा माराव्या लागतील, अशा पद्धतीने कामकाज व्हावे. नागरिकांशी आपुलकीने वागणे, त्यांच्या कामांना प्राधान्य देणे व तक्रारी निर्माण होऊ न देणे, हे प्रशासनाचे कर्तव्य असल्याचे त्यांनी अधोरेखित केले. विकासकामे व विविध प्रकल्प वेळेत पूर्ण झाल्यास जिल्ह्यात मोठ्या प्रमाणात रोजगारनिर्मिती होईल, असेही त्यांनी नमूद केले. सावंतवाडी, वेंगुर्ला आणि दोडामार्ग या तीन तालुक्यांमध्ये विकासाची मोठी क्षमता असून, उपविभागाच्या सर्वांगीण विकासासाठी सर्वांनी सक्रिय सहभाग घ्यावा, असे आवाहन त्यांनी केले.

यावेळी आमदार दीपक केसरकर म्हणाले की, ही इमारत अत्यंत सुसज्ज स्वरूपाची असून तिच्या माध्यमातून नागरिकांना अधिकाधिक सेवा पारदर्शकपणे मिळणार आहेत. पालकमंत्री नितेश राणे यांच्या नेतृत्वाखाली सिंधुदुर्ग जिल्ह्याची विकासाकडे घोडदौड सुरू असल्याचेही त्यांनी नमूद केले.

कार्यक्रमाची प्रस्तावना जिल्हाधिकारी तृप्ती धोडमिसे यांनी केली. त्या म्हणाल्या की, सन १९१० साली बांधण्यात आलेली जुनी इमारत कालबाह्य झाल्याने नागरिकांच्या गरजेनुसार आधुनिक आणि नवीन इमारत उभारण्याचे नियोजन करण्यात आले आहे. ही इमारत भविष्यात नागरिकांसाठी अत्यंत उपयुक्त ठरणार आहे.

कार्यक्रमाचे आभार उपविभागीय अधिकारी सचिन घारे यांनी मानले. त्यांनी सांगितले की, या इमारतीतून स्वच्छ व पारदर्शक कारभार राबवून नागरिकांना कमी वेळेत अधिक सेवा दिल्या जातील.

या कार्यक्रमास आमदार दीपक केसरकर, नगराध्यक्ष श्रद्धा राजे भोसले, जिल्हाधिकारी तृप्ती धोडमिसे, उपविभागीय अधिकारी सचिन घारे, उपसंचालक जमाबंदी आयुक्त कार्यालयाचे हेमंत निकम, जिल्हा बँकेचे अध्यक्ष मनीष दळवी, सावंतवाडी तहसीलदार श्रीधर पाटील, वेंगुर्ला तहसीलदार ओंकार ओतारी, तसेच युवराज लखमराजे भोंसले आदी मान्यवर उपस्थित होते.