पॉलिटेक्निकच्या चार अभ्यासक्रमांना सलग तिसऱ्यांदा एनबीए मान्यता; गुणवत्तापूर्ण शिक्षणाची परंपरा कायम

सावंतवाडी :

यशवंतराव भोसले इन्स्टिट्यूट ऑफ टेक्नॉलॉजीच्या पॉलिटेक्निक विभागाने पुन्हा एकदा शैक्षणिक गुणवत्तेचा ठसा उमटवला आहे. संस्थेच्या मेकॅनिकल, इलेक्ट्रिकल, सिव्हिल व कॉम्प्युटर या चार अभ्यासक्रमांना एनबीए – नॅशनल बोर्ड ऑफ ॲक्रेडिटेशनचे मानांकन सलग तिसऱ्यांदा प्राप्त झाले आहे. हे मानांकन १ जुलै २०२५ ते ३१ डिसेंबर २०२८ या कालावधीसाठी वैध असणार आहे. यापूर्वी २०१९ आणि २०२२ मध्येही या अभ्यासक्रमांना राष्ट्रीय मान्यता मिळाली होती.

या यशाबद्दल प्रतिक्रिया देताना संस्थेचे संस्थापक व कार्याध्यक्ष अच्युत सावंत भोसले यांनी सांगितले की, हे मानांकन संस्थेच्या दर्जेदार, संशोधनाभिमुख आणि उद्योगपूरक शिक्षणाच्या दिशेने केलेल्या प्रयत्नांना बळ देणारे असून भविष्यात अधिक उत्तम कामगिरीसाठी प्रेरणा देणारे आहे.

कॉलेजचे उपप्राचार्य व पॉलिटेक्निक इन्चार्ज गजानन भोसले यांनी स्पष्ट केले की, हे यश केवळ संस्थेचे नसून संचालक मंडळ, विभागप्रमुख, प्राध्यापक, कर्मचारी, विद्यार्थी, माजी विद्यार्थी, उद्योगतज्ज्ञ आणि पालक यांच्या सामूहिक परिश्रमांचे फलित आहे.

या राष्ट्रीय मानांकनाच्या निमित्ताने कार्याध्यक्ष अच्युत सावंत भोसले, अध्यक्षा ॲड. अस्मिता सावंत भोसले, सचिव संजीव देसाई, मुख्य कार्यकारी अधिकारी ले. कर्नल रत्नेश सिन्हा (नि.) तसेच प्राचार्य डॉ. रमण बाणे यांनी उपप्राचार्य, डिप्लोमा विभागप्रमुख, शिक्षक व विद्यार्थ्यांचे अभिनंदन करून पुढील वाटचालीसाठी शुभेच्छा दिल्या.

सलग तिसऱ्यांदा मिळालेल्या या एनबीए मानांकनामुळे संस्थेच्या शैक्षणिक गुणवत्तेवर शिक्कामोर्तब झाले असून विद्यार्थ्यांना उच्च दर्जाचे शिक्षण घेऊन उज्ज्वल करिअर घडविण्याची संधी उपलब्ध झाली आहे.