वामनराव महाडिक विद्यालयात वार्षिक पारितोषिक वितरण समारंभ उत्साहात…
कणकवली / तळेरे :
“बुद्धी हीच खरी संपत्ती आहे. प्रयत्न करा,यश तुमच्या हातात आहे. शरीर,मन आणि बुद्धी यांचा मेळ घालत जीवनाकडे सकारात्मक दृष्टीने पाहा. छत्रपती शिवाजी महाराजांचा आदर्श घ्या, अध्यात्मिक वाचन करा, देशभक्ती जपा, आई-वडिलांचा सन्मान ठेवा आणि चांगला माणूस बनण्याचा प्रयत्न करा,” असे प्रेरणादायी उद्गार समारंभाचे अध्यक्ष तथा पोलीस उपअधीक्षक, लाचलुचपत प्रतिबंधक विभाग,सिंधुदुर्गचे विजय शिवराम पांचाळ यांनी काढले. वामनराव महाडिक माध्यमिक विद्यालय व कनिष्ठ कला, वाणिज्य व विज्ञान महाविद्यालय, तळेरे येथे आयोजित वार्षिक पारितोषिक वितरण समारंभात ते अध्यक्षस्थानावरून बोलत होते.
या कार्यक्रमास सामाजिक कार्यकर्ते व उद्योजक सुकांत वरुणकर, नांदगाव पंचक्रोशी माध्य. शिक्षण संस्थेचे अध्यक्ष नागेश मोरये, पंचक्रोशी विद्यामंदिर गवाणेचे अध्यक्ष अशोक तळेकर, माजी वित्त व बांधकाम सभापती जि. प. सिंधुदुर्गचे रवींद्र जठार, पत्रकार उदय दुदवडकर, वारगांव उपसरपंच नारायण शेटये, कणकवलीचे माजी सभापती दिलीपभाई तळेकर, तळेरे वाचनालयाचे अध्यक्ष राजू वळंजू, तळेरे उपसरपंच संदीप घाडी, तळेरे पोलीस पाटील चंद्रकांत जाधव, प्रशालेचे प्राचार्य अविनाश मांजरेकर,शाळा समितीचे सदस्य, शिक्षक-शिक्षकेतर कर्मचारी,पालक व विद्यार्थी मोठ्या संख्येने उपस्थित होते.
कार्यक्रमाची सुरुवात सरस्वती पूजन, छत्रपती शिवाजी महाराजांच्या पुतळ्यास पुष्पहार अर्पण तसेच संस्थापक वामनराव महाडिक यांच्या प्रतिमेचे पूजन करून करण्यात आली. दीपप्रज्वलनानंतर ईशस्तवन, स्वागतगीत व संस्था गीत सादर करण्यात आले. पाहुण्यांचा परिचय सहाय्यक शिक्षक सचिन शेटये यांनी करून दिला.
प्रास्ताविकात प्राचार्य अविनाश मांजरेकर यांनी शाळेच्या शैक्षणिक व सहशैक्षणिक क्षेत्रातील चढता आलेख प्रभावी शब्दांत मांडला. यावेळी मान्यवर पाहुण्यांचा शाल, श्रीफळ व पुष्पगुच्छ देऊन सत्कार करण्यात आला. तसेच अशोक तळेकर व नागेश मोरये यांनीही आपले मनोगत व्यक्त करून विद्यार्थ्यांना मार्गदर्शन केले.
कार्यक्रमाच्या शेवटी विविध क्षेत्रांत उल्लेखनीय कामगिरी करणाऱ्या विद्यार्थ्यांना पारितोषिके वितरित करण्यात आली.कार्यक्रमाच्या यशस्वीतेसाठी सर्व शिक्षक व शिक्षकेतर कर्मचाऱ्यांनी विशेष परिश्रम घेतले.
