देवगड समुद्रात परप्रांतीय ट्रॉलरवर धडक कारवाई;
कर्नाटकची ‘महारथी’ नौका जप्त
देवगड
परप्रांतीय नौकांकडून होणाऱ्या बेकायदा मासेमारीला आळा घालण्यासाठी मत्स्यव्यवसाय विभागाने कारवाईचा सपाटा सुरू ठेवला असून, त्याचाच भाग म्हणून देवगडसमोर महाराष्ट्राच्या सागरी हद्दीत अनधिकृत ट्रॉलिंग करणाऱ्या कर्नाटक राज्यातील एका मासेमारी नौकेवर आज पहाटे यशस्वी धडक कारवाई करण्यात आली.
दिनांक २० डिसेंबर २०२५ रोजी पहाटे सुमारे ४.३० वाजता देवगडसमोर सुमारे १४ वाव अंतरावर ‘महारथी’ नावाची ट्रॉलर नौका मासेमारी करताना आढळून आली. गस्ती पथकाने जवळ जाताच संबंधित नौकेने पळ काढण्याचा प्रयत्न केला; मात्र सतर्क पथकाने पाठलाग करून नौका ताब्यात घेतली. तपासाअंती महाराष्ट्र सागरी मासेमारी नियमन अधिनियम १९८१ व सुधारित अधिनियम २०२१ अंतर्गत बेकायदा मासेमारी सिद्ध झाल्याने नौका जप्त करण्यात आली.
‘महारथी’ (नोंदणी क्रमांक : IND-KA-02-MM-6116) ही नौका कर्नाटक राज्याच्या जलक्षेत्रासाठी वैध परवाना असलेली असून, महाराष्ट्राच्या सागरी हद्दीत कोणताही वैध परवाना न घेता ट्रॉलिंग पद्धतीने मासेमारी करत असल्याचे निदर्शनास आले. नौकेवर तांडेलसह एकूण सात खलाशी होते. जप्त केलेली नौका देवगड बंदरात सुरक्षित आणण्यात आली असून, सापडलेल्या मासळीचा लिलाव प्रक्रिया सुरू आहे. प्रकरणाचा सविस्तर अहवाल सहाय्यक आयुक्त मत्स्यव्यवसाय, सिंधुदुर्ग यांच्याकडे सादर करण्यात येणार असून, सुनावणीनंतर संबंधितांवर कठोर कायदेशीर कारवाई केली जाणार आहे.
ही कारवाई अंमलबजावणी अधिकारी तथा सहाय्यक मत्स्य विकास अधिकारी (परवाना अधिकारी, देवगड) श्री. किरण वाघमारे यांच्या नेतृत्वाखाली पार पडली. सागरी सुरक्षा पर्यवेक्षक व रक्षक श्री. टुकरुल, श्री. खवले, श्री. फाटक, श्री. बांधकर, श्री. नेसवंकर आणि श्री. सावजी यांनी या मोहिमेत सहकार्य केले. संपूर्ण कारवाई सहाय्यक आयुक्त मत्स्यव्यवसाय, सिंधुदुर्ग श्री. सागर कुवेसकर यांच्या मार्गदर्शनाखाली पूर्ण करण्यात आली.
विशेष म्हणजे, चालू मासेमारी हंगामात सिंधुदुर्ग जिल्ह्यातील परप्रांतीय नौकांवरील ही सहावी मोठी कारवाई असून, विभागाच्या सततच्या कारवायांमुळे स्थानिक मच्छीमारांचे हित जपले जात असून सागरी जैवविविधतेचे संरक्षणही प्रभावीपणे होत आहे. पालकमंत्री तथा मत्स्यव्यवसाय मंत्री श्री. नितेश राणे यांच्या दिशानिर्देशनाखाली विभाग कायद्याची काटेकोर अंमलबजावणी करत असल्याचे यानिमित्ताने पुन्हा स्पष्ट झाले आहे.
