शिवसेना ओबीसी–व्हीजेएनटी जिल्हाप्रमुखपदी सुदन कवठणकरांची नियुक्ती; संघटनेला नवी दिशा

सावंतवाडी :
शिवसेना ओबीसी आणि व्हीजेएनटी जिल्हाप्रमुखपदी सुदन कवठणकर यांची नियुक्ती करण्यात आली आहे. माजी मंत्री दीपक केसरकर व जिल्हाप्रमुख संजू परब यांच्या विशेष शिफारशीवरून पक्षाने त्यांच्याकडे ही महत्त्वाची जबाबदारी सोपवली आहे. ही नियुक्ती एका वर्षाच्या कालावधीसाठी असणार आहे.

सामाजिक क्षेत्रातील त्यांच्या भरीव योगदानाची आणि शिवसेनेत प्रवेशानंतर पक्षबांधणीसाठी घेतलेल्या मेहनतीची दखल घेत ही निवड करण्यात आली आहे. त्यांच्या नियुक्तीमुळे ओबीसी तसेच भटक्या-विमुक्त समाजाच्या प्रलंबित प्रश्नांना प्रभावी वाचा मिळेल, असा विश्वास शिवसैनिकांनी व्यक्त केला आहे.

हिंदुहृदयसम्राट बाळासाहेब ठाकरे यांचे हिंदुत्ववादी विचार, धर्मवीर आनंद दिघे यांची जनतेसाठीची न्यायप्रिय भूमिका आणि मुख्यमंत्री एकनाथ शिंदे यांचा सर्वसमावेशक विकासाचा दृष्टिकोन समाजाच्या शेवटच्या घटकापर्यंत पोहोचवण्याची जबाबदारी कवठणकर यांच्यावर असणार आहे.

या नियुक्तीचे सर्व स्तरांतून स्वागत होत असून, शिवसेना ओबीसी–व्हीजेएनटी महाराष्ट्र प्रदेश उपाध्यक्ष श्रीधर पेडणेकर यांनी कवठणकर यांचे अभिनंदन करत, “या नियुक्तीमुळे संघटनेला नवी उभारी मिळेल आणि सामाजिक कार्याला गती येईल,” अशा शुभेच्छा दिल्या आहेत.