वेंगुर्ला नगरपरिषद निवडणूक : राजन गिरप यांच्या नेतृत्वात भाजपचा जोरदार प्रचार शुभारंभ
भव्य शक्तीप्रदर्शनासह प्रचाराची सुरुवात
वेंगुर्ला :
वेंगुर्ला नगरपरिषद निवडणुकीत भारतीय जनता पक्षाने आज दमदार शक्तीप्रदर्शन करीत भव्य प्रचाराचा शुभारंभ केला. नगराध्यक्ष पदाचे उमेदवार राजन गिरप तसेच २० नगरसेवक उमेदवारांच्या प्रचाराची सुरुवात श्रीदेवी सातेरी आणि श्री देव रामेश्वर मंदिरात श्रीफळ ठेवून मंगल वातावरणात पार पडली.
या कार्यक्रमाला जिल्हा बँक अध्यक्ष मनीष दळवी, भाजपा राज्य परिषद सदस्य राजू राऊळ, जिल्हा उपाध्यक्ष प्रसन्ना (बाळू) देसाई, तालुकाध्यक्ष विष्णू (पप्पू) परब, महिला तालुका अध्यक्षा सुजाता पडवळ, जिल्हा कार्यकारिणी सदस्य साईप्रसाद नाईक, तालुका सरचिटणीस वसंत तांडेल, महिला जिल्हा उपाध्यक्ष वृंदा गवंडळकर, युवा मोर्चा जिल्हा उपाध्यक्ष हेमंत गावडे यांच्यासह मोठ्या संख्येने कार्यकर्ते उपस्थित होते.
या ठिकाणी जिल्हा बँक अध्यक्ष मनीष दळवी म्हणाले,
“खासदार नारायणराव राणे, पालकमंत्री नितेश राणे आणि प्रदेशाध्यक्ष रवींद्र चव्हाण यांच्या मार्गदर्शनाखाली भाजपाचा झेंडा वेंगुर्ला नगरपरिषदेवर निश्चित फडकेल,” असा ठाम विश्वास त्यांनी व्यक्त केला.
भाजपचे सर्व उमेदवार उत्साहात मैदानात उतरल्याने वेंगुर्ल्यातील राजकीय वातावरण रंगतदार बनले आहे. नगरसेवक पदाच्या उमेदवारांमध्ये मंजुषा महेंद्र आरोलकर, रवी रमाकांत शिरसाठ, गौरी गणेश माईणकर, प्रीतम रमाकांत सावंत, विनायक सदानंद गवंडळकर, गौरी सुदेश मराठे, आकांक्षा आनंद परब, तातोबा उर्फ सुधीर महादेव पालयेकर, सुषमा सूर्यकांत प्रभूखानोलकर, विनय अशोक नेरूरकर, रिया वासुदेव केरकर, सदानंद तुळशीदास गिरप, काजल किरण गिरप, सचिन भगवान शेट्ये, श्रेया शैलेश मयेकर, प्रसाद विनायक गुरव, युवराज लक्ष्मण जाधव, यशस्वी योगेश नाईक, प्रणव बाबली वायंगणकर आणि शीतल द्यानेश्वर आंगचेकर यांचा समावेश आहे.
भाजपच्या आजच्या या भव्य शक्तीप्रदर्शनातून पक्ष वेंगुर्ला नगरपरिषद काबीज करण्यासाठी पूर्णपणे सज्ज असल्याचे स्पष्ट झाले असून, आगामी दिवसांत प्रचाराला अधिक वेग येण्याची चिन्हे दिसत आहेत.
