सावंतवाडी :
आज सावंतवाडी नगरपरिषद निवडणुकीसाठी उद्धव बाळासाहेब ठाकरे शिवसेनेकडून सामाजिक कार्यकर्त्या सीमा मठकर यांनी नगराध्यक्ष पदासाठी अर्ज दाखल केला. त्यांच्या रूपाने पंचवार्षिक निवडणुकीसाठी दाखल झालेला हा पहिलाच अर्ज ठरला. निवडणूक निर्णय अधिकारी व तहसीलदार श्रीधर पाटील, सहाय्यक निवडणूक अधिकारी तथा मुख्याधिकारी संतोष जिरगे यांच्याकडे हा अर्ज दाखल करण्यात आला.
या वेळी माजी खासदार विनायक राऊत, संपर्क प्रमुख अरुण दुधवडकर, जिल्हाप्रमुख बाबुराव धुरी, विधानसभा प्रमुख रूपेश राऊळ, उपनेत्या जान्हवी सावंत, महिला जिल्हाप्रमुख श्रेया परब, सुकन्या नरसुले तसेच उमेदवार सीमा मठकर उपस्थित होत्या.
माजी खासदार विनायक राऊत म्हणाले, “उद्धव ठाकरे यांच्या आदेशानुसार सावंतवाडीत नगराध्यक्षपदासाठी आम्ही सौ. सीमा मठकर यांना उमेदवार घोषित केले आहे. त्या स्व. आमदार जयनंद मठकर यांच्या सूनबाई असून सामाजिक कार्यात सक्रिय आहेत. त्यांच्या विजयाबाबत आम्हाला पूर्ण खात्री आहे.”
सौ. सीमा मठकर यांनी सांगितले की, “मी नगरसेवकांसह नागरिकांचा विश्वास संपादन करून सावंतवाडीच्या विकासासाठी काम करणार आहे. नगरसेवक पदांच्या निवडणुकीतही आमचे उमेदवार विजयी होतील,” असा विश्वास त्यांनी व्यक्त केला.
