*वकिलांचा आणि पक्षकारांचा संघर्ष संपणार?

बोरीवली, दिंडोशी, मीरा रोड कोर्टांसाठी ‘बेस्ट’ची थेट बस सेवा सुरू करा:

ॲड. जुन्नरकर आणि बार असोसिएशनची जोरदार मागणी.*

​मुंबई:

बोरीवली ॲडव्होकेट्स बार असोसिएशन आणि काँग्रेसचे मा. महाराष्ट्र प्रवक्ते, ॲड. धनंजय जुन्नरकर यांनी बोरीवली कोर्ट, दिंडोशी कोर्ट आणि नव्याने स्थापन झालेल्या मीरा रोड कोर्टांना जोडणाऱ्या थेट ‘बेस्ट’ बस सेवेची तात्काळ सुरुवात करण्याची मागणी केली आहे. बोरिवली हुन दिंडोशी कोर्ट, बोरिवली हुन मीरारोड कोर्ट अशी बस सेवा झाल्यास हजारो प्रवाश्यांना त्याचा फायदा होईल असे प्रतिपादन ॲड धनंजय जुन्नरकर ह्यांनी केले आहे.

*​५,००० हून अधिक वकिलांची गैरसोय*
​बोरीवली ॲडव्होकेट्स बार असोसिएशनचे ५,००० हून अधिक सदस्य या तिन्ही कोर्टात नियमितपणे कामकाज पाहतात.
​दिंडोशी कोर्ट आणि मीरा रोड कोर्ट ही लोकल ट्रेन आणि मेट्रो ट्रेनपासून दूर असल्याने, वकिलांना आणि पक्षकारांना खासगी वाहनांवर अवलंबून राहावे लागते.
​बोरीवली कोर्ट आणि दिंडोशी/मीरा रोड कोर्टातील अंतर अवघे ६-७ किलोमीटर असूनही, सध्या या कोर्ट संकुलांना जोडणारी कोणतीही थेट ‘बेस्ट’ बस सेवा उपलब्ध नाही. त्यामुळे गरीब पक्षकार आणि वकिलांची आर्थिक ओढाताण होत आहे.
​
*पार्किंग कोंडी आणि वाहतुकीवर परिणाम*

​थेट बस सेवेच्या अभावामुळे लोक खाजगी वाहने वापरतात, ज्यामुळे बोरीवली आणि दिंडोशी कोर्टात पार्किंगची गंभीर समस्या निर्माण झाली आहे.
​समर्पित ‘बेस्ट’ बस मार्गामुळे पार्किंगचा प्रश्न मोठ्या प्रमाणात सुटण्यास मदत होईल, तसेच सोयीस्कर, सुरक्षित आणि परवडणारा वाहतूक पर्याय मिळेल. जास्तीत जास्त लोक सार्वजनिक वाहतुकीचा उपयोग करतील.
​असोसिएशन आणि ॲड. जुन्नरकर यांनी वाणिज्य आणि उद्योग मंत्री श्री पीयूष गोयल, मुंबई काँग्रेस अध्यक्षा खासदार वर्षा गायकवाड,आमदार श्री संजय उपाध्याय, श्री प्रताप सरनाईक आणि विविध ‘बेस्ट’ व MSRTC डेपोच्या व्यवस्थापकांसह अनेक संबंधित अधिकाऱ्यांकडे ०३ नोव्हेंबर २०२५ रोजी ही विनंती केली आहे.
​या मागणीचा सहानुभूतीपूर्वक विचार करून लवकरात लवकर समर्पित बस सेवा सुरू करावी, अशी विनंती बोरीवली ॲडव्होकेट्स बार असोसिएशन आणि ॲड. धनंजय जुन्नरकर यांनी केली आहे.