वायंगणी येथील घरकुल लाभार्थ्यांना बांधकामासाठी ५ ब्रास वाळू उपलब्ध करुन द्यावी

तहसीलदार ओंकार ओतारी यांच्या कडे लेखी निवेदनाद्वारे मागणी

वेंगुर्ले : प्रतिनिधी

वेंगुर्ले तालुक्यातील वायंगणी ग्रामंपचायत हद्दीत प्रधानमंत्री व मोदी आवास (ग्रामीण) अंतर्गत मंजूर घरकुल लाभार्थ्यांना बांधकामासाठी ५ ब्रास वाळू पुरवठा करण्यात यावा अशी मागणी वायंगणी येथील लाभार्थ्यां समवेत सरपंच दत्ताराम उर्फ अवी दुतोंडकर यांनी तहसीलदार ओंकार ओतारी यांच्या कडे आज लेखी निवेदनाद्वारे केली आहे.

दिलेल्या निवेदनात म्हटले आहे की, वायंगणी ग्रामंपचायत हद्दीत प्रधानमंत्री व मोदी आवास (ग्रामीण) अंतर्गत ७९ घरकुल मंजूर आहेत. सदर ७९ घरकुल तात्काळ पूर्ण करण्यात यावी असे मुख्यकार्यकारी अधिकारी जि. प. सिंधुदुर्ग यांचे ग्रामपंचायतीला आदेश आहेत व त्याप्रमाणे ग्रामपंचायतचा सतत आढावा घेतला जात आहे. लाभार्थ्यांच्या घरकुल बांधकाम सुरु करण्याविषयी तीन वेळा सभा घेण्यात आल्या, तसेच तीन पत्रे देण्यात आली त्यावेळी लाभार्थ्यांची सर्वांत महत्वाची अडचण ठरत असलेली बाब म्हणजे बाळू उपलब्ध होत नाही. ही समस्या सर्वच लाभार्थ्यांनी निदर्शनास आणून दिली. तसेच प्रत्येक घरकुल लाभार्थ्याला ५ ब्रास वाळू देण्याचे शासनाने जाहिर केलेले होते. त्याप्रमाणे वाळू उपलब्ध होत नाही तसेच खाजगी व्यवसायीकाकडे वाळू लिलाव प्रक्रिया झालेली नसल्यामुळे बाळू उपलब्ध होत नाही अशा स्थितीत लाभार्थ्यांची स्थिती ‘इकडे आड तिकडे विहीर’ अशी झालेली आहे. त्यामुळे घरकुल बांधकामे थांबलेली आहेत. तरी लोक भावनेचा व गरीब लाभार्थ्यांचा विचार करून वाळू उपलब्ध करून देण्याविषयी शासन स्तरावर आपल्या मार्फत प्रयत्न व्हावेत अशी मागणी या निवेदनात केली आहे. यावेळी भाजप तालुकाध्यक्ष पप्पू परब, ग्रामपंचायत सदस्य विनू मठकर, महेष मुणनकर, सौ. विदया गोवेकर तसेच घरकुल लाभार्थी आणि प्रणव वायंगणकर, सायमन आल्मेडा आदी उपस्थित होते.