*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री ज्योत्स्ना तानवडे लिखित अप्रतिम काव्यरचना*
*’ दीपोत्सव आनंदाचा ‘*
दिवाळीतले दीप उजळले तेज पसरले दारी
आनंदाची पणती उजळू भाग्योदय करणारी ||ध्रु||
सण वर्षाचा सण तेजाचा हसत दिवाळी आली
घराघरातुन रंगबिरंगी छान सजावट झाली
दारापुढती रेखियली मी रांगोळी बघ न्यारी
आनंदाची पणती उजळू भाग्योदय करणारी ||
दीप तेवते पहा मांडले विविध प्रकारे खुलती
तेजाची हो अखंड उधळण तारकादले दिसती
महात्म्य आहे हेच सणाचे चैतन्य मिळे भारी
आनंदाची पणती उजळू भाग्योदय करणारी ||
नरकासुरवध लक्ष्मीपूजन पाडवा हा शुभंकर
सण संमेलन खासियत असे दीपावलीत सुंदर
आनंदाला उधाण येई नाती सुखावणारी
आनंदाची पणती उजळू भाग्योदय करणारी ||
परदारी पण उजेड येवो कृती करावी सात्विक
आनंदाचे वाटप करणे सौख्य होतसे आत्मिक
दिवा दिव्याने पेटत जातो एकत्व शुभंकारी
आनंदाची पणती उजळू भाग्योदय करणारी ||
*ज्योत्स्ना तानवडे. पुणे*
