श्री क्षेत्र कुणकेश्वर दीपोत्सव २०२५ — भव्य आयोजनात, भक्तिभाव व सांस्कृतिक उत्साहात होणार ९ वा दीपप्रज्वलन सोहळा!

देवगड | प्रतिनिधी:

श्री देव कुणकेश्वर मंदिर देवस्थान ट्रस्ट, कुणकेश्वर यांच्या वतीने दीपावली पाडव्याच्या निमित्ताने श्री क्षेत्र कुणकेश्वर दीपोत्सव २०२५ मोठ्या भक्तिभावात आणि पारंपरिक साजशृंगारात बुधवार, २२ ऑक्टोबर २०२५ रोजी साजरा होणार आहे. यावर्षी या दीपोत्सवाचे ९ वे वर्ष असून, भाविकांसाठी एक विशेष भक्तिपर अनुभव घेऊन येणार आहे.

या दिवशी सायंकाळी ६:०० वाजता दीपोत्सवाचा शुभारंभ होणार असून, मंदिर परिसर एकवीस हजार पणत्यांच्या प्रकाशाने उजळून निघणार आहे. या दिव्य आरासेसाठी प्रत्येकी पणतीला ₹१०/- देणगी निश्चित करण्यात आली आहे. रांगोळी प्रदर्शन, दीपज्योत आरास, आणि विविध सांस्कृतिक कार्यक्रम भाविकांचे विशेष आकर्षण ठरणार आहेत.

“स्वर श्रीपाद” संगीत मैफिल ठरणार विशेष आकर्षण
या वर्षीच्या दीपोत्सवात “स्वर श्रीपाद” या संगीतमय संध्याकाळी प्रसिद्ध गायक श्रीपाद शांताराम जांबळेकर (गोवा), गायिका करिश्मा शेटकर, युवा गायक साईश नाईक यांचे सुमधुर गायन रसिकांना ऐकायला मिळणार आहे. साथसंगत म्हणून केतन च्यारी (कीबोर्ड), राज मडगावकर (तबला), प्रतीक धामस्कर (संवादिनी), प्रतीम धामस्कर (पखवाज/टाळ) आणि सूत्रसंचालन सी. अलीशा नाईक यांचे असणार आहे.

मुख्य कार्यक्रमांची रूपरेषा पुढीलप्रमाणे:

सायं. ६:०० ते ८:३० – “स्वर श्रीपाद” संगीत मैफिल

सायं. ७:०० – मुख्य मंदिरात दीपप्रज्वलन (मान्यवरांच्या हस्ते)

सायं. ७:१५ – मंदिर परिसर दीपज्वलन सोहळा

रात्री. ८:३० ते ९:०० – सन्मान सोहळा

रात्री. ९:०० ते ९:३० – पालखी प्रदक्षिणा सोहळा

रात्री. ९:३० – सांगता

या दीपोत्सवाबाबत माहिती कुणकेश्वर देवस्थान ट्रस्टचे अध्यक्ष श्री. एकनाथ तेली यांनी पत्रकार परिषदेत दिली. यावेळी खजिनदार उदय पेडणेकर, अरविंद वाळके, महेश जोईल आदी उपस्थित होते.

श्री देव कुणकेश्वर मंदिर देवस्थान ट्रस्टतर्फे सर्व भाविक, भक्तजन आणि नागरिकांना दीपोत्सवात मोठ्या संख्येने सहभागी होण्याचे आवाहन करण्यात आले असून, या पारंपरिक उत्सवात सहभागी होऊन श्री देव कुणकेश्वरांच्या कृपेचा लाभ घ्यावा, असे आवाहन आयोजकांनी केले आहे.