एक दिवस, एक तास, एक साथ – संपूर्ण जिल्हा होणार श्रमदानात सहभागी

गावोगावी शाळा, अंगणवाडी, कार्यालये व सार्वजनिक ठिकाणे स्वच्छतेत चमकणार

महात्मा गांधी जयंतीपूर्वी स्वच्छ भारत मिशन अंतर्गत उपक्रम

ओरोस :

स्वच्छ भारत मिशन अंतर्गत महात्मा गांधी यांच्या जयंतीचे औचित्य साधून २ ऑक्टोबर हा दिवस ‘स्वच्छ भारत दिवस’ म्हणून साजरा करण्यात येणार आहे. त्यानुसार १७ सप्टेंबर ते २ ऑक्टोबर या कालावधीत संपूर्ण जिल्ह्यात “स्वच्छता ही सेवा” मोहीम राबविण्यात येत आहे.

या मोहिमेचा एक महत्त्वपूर्ण टप्पा म्हणून गुरुवार दि. २५ सप्टेंबर रोजी सकाळी ८ ते ११ या वेळेत जिल्ह्यात “महास्वच्छता अभियान” राबविण्यात येणार आहे. “एक दिवस, एक तास, एक साथ” या संकल्पनेवर आधारित या देशव्यापी श्रमदान उपक्रमात जिल्ह्यातील सर्व ग्रामस्थांनी सक्रिय सहभाग नोंदवावा, असे आवाहन जिल्हा परिषदेचे मुख्य कार्यकारी अधिकारी रविंद्र खेबुडकर यांनी केले आहे.

या वर्षी “स्वच्छता ही सेवा” साठी “स्वच्छोत्सव” ही थीम निश्चित करण्यात आली आहे. या अंतर्गत तालुका व गावस्तरावर परिसर स्वच्छतेचे उपक्रम सुरू असून अस्वच्छ ठिकाणांची निवड करून त्यांचे मॅपिंग व सफाई करण्यात येत आहे.

२५ सप्टेंबर रोजी होणाऱ्या महास्वच्छता अभियानात ग्रामस्थ, शालेय विद्यार्थी, महिला बचत गट, युवक, शासकीय कर्मचारी यांचा मोठ्या प्रमाणावर सहभाग राहणार आहे. गावातील शाळा, अंगणवाडी, शासकीय कार्यालये तसेच सार्वजनिक ठिकाणांची स्वच्छता करण्यात येणार आहे.

या अभियानाची प्रभावी प्रसिद्धी व जनजागृती करण्यासाठी गावपातळीवर व्हॉट्सअँप ग्रुप, दवंडी, नोटीस तसेच सार्वजनिक ठिकाणी फलक लावले जातील. जास्तीत जास्त ग्रामस्थांचा सहभाग मिळविण्यासाठी सर्व ग्रामपंचायतींनी योग्य नियोजन करावे, असेही आवाहन खेबुडकर यांनी केले आहे.