कोमसाप संस्थापक अध्यक्ष पद्मश्री मधु मंगेश कर्णिक राहणार उपस्थित

सावंतवाडी:

कोकण मराठी साहित्य परिषद प्रांत विभागाची वार्षिक सर्वसाधारण सभा सिंधुदुर्ग जिल्ह्यात कुडाळ येथील मराठा मंडळ सभागृहात २० सप्टेंबर रोजी आयोजित करण्यात आली असून या सभेच्या नियोजनासाठी जिल्ह्याच्या नूतन कार्यकारिणीची पहिली बैठक जिल्हाध्यक्ष श्री मंगेश मसके यांच्या अध्यक्षतेखाली आज सावंतवाडी येथील विश्रामगृहावर पार पडली. कित्येक वर्षानंतर कोमसापची प्रांत विभागाची सर्वसाधारण सभा सिंधुदुर्ग जिल्ह्यात होत असल्याने कोमसापच्या पदाधिकारी, सदस्यांमध्ये उत्साह दिसून आला. या सभेला संस्थापक अध्यक्ष पद्मश्री मधु मंगेश कर्णिक उपस्थित राहणार आहेत.

कोकण मराठी साहित्य परिषद सिंधुदुर्ग मंडळ सदर सर्वसाधारण सभेचे नियोजन करत असून जिल्ह्यातील प्रत्येक तालुक्यातून जास्तीत जास्त आजीव सदस्यांनी उपस्थित राहून सिंधुदुर्ग जिल्ह्यात होणारी ही सभा यशस्वीरित्या पार पाडावी असे आवाहन जिल्हाध्यक्षांनी केले आहे. यावेळी जिल्ह्यातील सर्व तालुक्यांमध्ये कोमसापच्या शाखा पुनर्स्थापित करण्यासंदर्भात निर्णय घेण्यात आला आहे. कोकण मराठी साहित्य परिषद प्रांत विभागाची नवीन कार्यकारिणीची निवड प्रक्रिया व वार्षिक सर्वसाधारण सभा. कुडाळ येथे मराठा मंडळाच्या सभागृहात सकाळी ११.४५ वाजता होणार आहे. कोमसापच्या अध्यक्षा सौ. नमिता कीर यांच्या अध्यक्षतेखाली सदरची प्रांत विभागाची वार्षिक सर्वसाधारण सभा सिंधुदुर्ग जिल्ह्यात होत असून ही सभा यशस्वी करण्यासाठी सिंधुदुर्ग जिल्हा मंडळाच्या वतीने जय्यत तयारी करण्यात येत आहे. या सभेला जवळपास राज्यातील विविध जिल्ह्यातून दीडशेहून अधिक सभासद उपस्थित राहणार आहेत, त्या दृष्टीने प्रत्येक तालुक्यात बैठका नियोजन करण्याचे देखील निश्चित करण्यात आले. सिंधुदुर्ग जिल्ह्यातील सर्व शाखांचे आजीव सदस्य मोठ्या संख्येने उपस्थित राहावे या दृष्टीने तालुकाध्यक्षांवर तशी जबाबदारी देण्यात आली आहे. यावेळी अध्यक्ष मंगेश मसके यांनी स्पष्ट केले की, सिंधुदुर्ग जिल्ह्यात सदरची सभा होत असून या सभेसाठी संस्थापक अध्यक्ष मधुभाई स्वतः उपस्थित राहणार असल्याने मोठ्या संख्येने सिंधुदुर्ग जिल्ह्यातून सदस्यांनी उपस्थित रहावे या दृष्टीने सर्वांनी प्रयत्न करून ही सभा यशस्वी करूया. यावेळी सर्व अध्यक्षा सौ.नमिता कीर, कार्याध्यक्ष प्रा.डॉ.प्रदीप ढवळ, विश्वस्त रमेश कीर व इतर केंद्रीय विश्वस्त, सदस्यांचे भव्य स्वागत करण्यात येणार आहे.

सदर बैठकीमध्ये प्रत्येक तालुक्यातून युवा साहित्यिक विभाग तयार करण्यासाठी युवा साहित्यिकांना कोकण मराठी साहित्य परिषदेच्या कार्यप्रवाहात आणण्यासाठीचे प्रयत्न करण्याचे ठरले.

त्याचबरोबर कुडाळ येथे २० सप्टेंबरला होणाऱ्या वार्षिक सर्वसाधारण सभेनंतर सिंधुदुर्ग जिल्ह्यातील कोकण मराठी साहित्य परिषदेच्या सदस्यांना पुस्तक प्रकाशन करायचे असेल तर ती संधी दिली जाणार आहे. दरम्यान कुडाळ येथील ज्येष्ठ सदस्या तथा कादंबरीकार सौ. वृंदा कांबळी यांचे पुस्तक प्रकाशित झाल्याने त्यांच्या अभिनंदनाचा ठरावही घेण्यात आला. तर कोकण मराठी साहित्य परिषदेचे आजीव सदस्य कै.श्रीपाद कशाळीकर यांच्यासह राज्यातील साहित्य क्षेत्रातील कोणाही व्यक्तींचे निधन झाले त्यांना श्रद्धांजली वाहण्यात आली. यावेळी खजिनदार अनंत वैद्य व जिल्हा साहित्य संमेलनाचे प्रमुख विठ्ठल कदम, भरत गावडे, माधव कदम, राजू तावडे, अभिमन्यू लोंढे, दीपक पटेकर यांनी आपले विचार मांडले. या बैठकीत जिल्हाध्यक्ष मंगेश मसके, सचिव ॲड संतोष सावंत, खजिनदार अनंत वैद्य, सहसचिव सुरेश पवार, माधव कदम, वृंदा कांबळी, विठ्ठल कदम, भरत गावडे. अभिमन्यू लोंढे, गणेश जेठे, दीपक पटेकर, राजू तावडे निलेश ठाकूर आदी जिल्हा कार्यकारिणी पदाधिकारी, सदस्य उपस्थित होते. यावेळी उपस्थितांचे स्वागत व आभार सचिव ॲड संतोष सावंत यांनी मानले.