दिव्यांग बालकांसाठी 2 ऑक्टोंबर रोजी शिबिराचे आयोजन

सिंधुदुर्गनगरी दि ३१ (जिमाका):-

 महाराष्ट्र राज्य विधी सेवा प्राधिकरण, मुंबई यांच्या निर्देशानुसार जिल्हा विधी सेवा प्राधिकरणामार्फत दिव्यांग बालकांची ओळख, तपासणी करण्याकरीता जिल्ह्यामध्ये २ ऑक्टोंबर २०२५ रोजी सावंतवाडी येथे शिबीराचे आयोजन करण्यात येणार आहे. या अनुषंगाने शिबाराची रुपरेषा ठरविण्याकरीता जिल्हा विधी सेवा प्राधिकरण अध्यक्ष, तथा प्रमुख जिल्हा व सत्र न्यायाधीश, डॉ. सुधीर देशपांडे यांच्या अध्यक्षतेखाली बैठक संपन्न झाली.

जिल्ह्यातील दिव्यांग मुलांचे सर्व्हेक्षण करुन त्यांना विविध प्रकारच्या शासकीय योजनांचा लाभ, दिव्यांग मुलांचे आयुष्यमान भारत कार्ड, आभा कार्ड, आधार कार्ड, यूनिक डिसेबिलिटी ओळखपत्र व वैद्यकीय तपासणी अशा विविध प्रकारचे लाभ मिळण्याकरीता या शिबीराचे सावंतवाडी येथे ०२ ऑक्टोबर २०२५ रोजी आयोजन करण्यात येणार आहे,असे जिल्हा विधी सेवा प्राधिकरणाचे अध्यक्ष डॉ. सुधीर देशपांडे यांनी यावेळी सांगितले.

याशिबिरामध्ये आरोग्य विभाग, महिला व बाल विकास विभाग, दिव्यांग विभाग तसेच जिल्ह्यातील दिव्यांगांसाठी काम करणाऱ्या सर्व शासकीय शाळा व अशासकीय संस्था (NGO) तसेच विविध विभागांचा  सहभाग असणार आहे.

अधिक माहितीसाठी जिल्हा विधी सेवा प्राधिकरण सचिव संपूर्णा गुंडेवाडी, तसेच तालुका विधी सेवा समिती, सावंतवाडी, कणकवली, देवगड, वेंगुर्ला, मालवण, कुडाळ व दोडामार्ग या कार्यालयांशी  किंवा जिल्हा विधी सेवा प्राधिकरण, सिंधुदुर्ग या कार्यालयाचा ई-मेल आयडी dlsa-sindhu@bhc.gov.in, संपर्क क्र. ०२३६२-२२८४१४, ८५९१९०३६०७, हेल्पलाईन क्रमांक-१५१०० वर संपर्क साधवा.

०००००

गिग आणि प्लॅटफॉर्म कामगारांनी

ई-श्रम पोर्टलवर नोंदणी करण्याचे आवाहन

सिंधुदुर्गनगरी दि 31 (जिमाका):- भारत सरकारच्या कामगार आणि रोजगार मंत्रालयाने (Ministry of Labour & Employment) गिग आणि प्लॅटफॉर्म कामगारांसाठी ई-श्रम पोर्टलवर नोंदणीसाठी सुविधा उपलब्ध करून दिलेली आहे. नोंदणी करून घेण्यासाठी पात्र गिग कामगारांनी http://register.eshram.gov.in/#/user/self  या अधिकृत लिंकवर जाऊन त्वरित नोंदणी करावी, असे आवाहन सरकारी कामगार अधिकारी रविराज कदम यांनी केले आहे.

भारतातील Plateform Worker यांना सामाजिक संरक्षण देण्याचे गरज ओळखून सामाजिक सुरक्षा कवच आयुष्यमान भारत अंतर्गत केंद्रीय अर्थसंकल्पीय तरतुदीची अंमलबजावणी करण्यासाठी तसेच सुरक्षा लाभ मिळवण्यासाठी आपल्या विभागातील Plateform Worker ई-श्रम पोर्टलवर नोंदणी करण्याचे आवाहन सरकारी कामगार अधिकारी यांनी केले आहे.

गेल्या काही वर्षांत प्लॅटफॉर्म इकोनॉमी भारतात आणि जागतिक स्तरावर रोजगार निर्मितीचे एक मोठे साधन बनले आहे. लाखो गिग कामगार या क्षेत्रात कार्यरत आहेत आणि त्यामुळे त्यांना सुरक्षित भविष्यासाठी सरकारी योजनांचा लाभ मिळावा म्हणून केंद्र शासनामार्फत गिग कामगारांच्या नोंदणीचा उपक्रम हाती घेण्यात आलेला आहे.

ई-श्रम पोर्टलवर नोंदणी केलेल्या गिग कामगारांना विविध सामाजिक सुरक्षा आणि कल्याणकारी योजनांचा लाभ देण्याचे प्रस्तावित आहे. यामुळे झोमॅटो, स्वीगी, ओला, उबेर यांसारख्या प्लॅटफॉर्मवर काम करणाऱ्या डिलिव्हरी बॉय, राइडर, ड्रायव्हर आणि इतर गिग कामगारांना मोठा दिलासा मिळणार आहे.