बेळणे येथे ट्रकला दुचाकीची धडक, दोघे युवक जागीच ठार…
कणकवली
मुंबई-गोवा महामार्गावर बेळणे येथे उभ्या असलेल्या ट्रकला दुचाकीची धडक बसली. यात दुचाकीवरील जैद मीर (१८) आणि शाहीद शेख (२०, दोन्ही रा. हुंबरट – मुस्लिमवाडी) हे दोन्ही युवक जागीच ठार झाले. रात्री साडे दहाच्या सुमारास ही घटना घडली. दोन्ही युवकांच्या अपघाती मृत्यूने हुंबरट परिसरावर शोककळा पसरली आहे.
जैद व शाहीद हे दोघे चायनिज आणण्यासाठी होंडा शाईन दुचाकी घेऊन नांदगांवला गेले होते. तेथून परतत असताना बेळणे येथे महामार्गानजीक उभ्या असलेल्या ट्रकला दुचाकीची जोरदार धडक बसली. रात्री जोरदार पाऊस सुरू असल्याने समोर असलेला ट्रक दिसला नाही. त्यामुळे वेगात येणारी दुचाकी या ट्रकच्या मागील बाजूस आदळली. ही धडक एवढी तीव्र होती की, दुचाकीच्या हँडलसह दर्शनी भागाचा चक्काचूर झाला. तर दोन्ही युवकांच्या डोक्याला गंभीर दुखापत झाली. महामार्गावरून जाणाऱ्या प्रवाशांनी दोन्ही युवकांना कणकवली उपजिल्हा रुग्णालयात दाखल केले. मात्र, डॉक्टरांनी तपासणी केली असता दोघांचाही मृत्यू झाला होता.
अपघाताची माहिती समजताच हुंबरट परिसरातील ग्रामस्थांनी आधी अपघातस्थळी व नंतर उपजिल्हा रुग्णालयात धाव घेतली. दोघांच्या अपघाती मृत्यूने सर्वच शोकाकूल झाले होते. दरम्यान कणकवली पोलिसांनी अपघातस्थळ गाठून पंचनामा केला. त्यानंतर पोलिसांनी उपजिल्हा रुग्णालय गाठून मयतांच्या नातेवाईकांचे जबाब घेतले. त्यानुसार अपघाताची पोलिसांत नोंद करण्याची कार्यवाही आता सुरू आहे.
