सावंतवाडी :
शिवसेना जिल्हाप्रमुख सचिदानंद ऊर्फ संजु परब यांच्या वाढदिवसानिमित्त सावंतवाडीत तीन दिवसीय भव्य नाट्यमहोत्सवाचे आयोजन करण्यात आले असून याचा शुभारंभ माजी नगराध्यक्ष राजन पोकळे यांच्या हस्ते श्रीफळ वाढवून करण्यात आला. शुभारंभ प्रसंगी ‘भगदत्त वध’ हे नाटक सादर करण्यात आले ज्याला रसिकांचा उत्स्फूर्त प्रतिसाद मिळाला.
यावेळी गोविंद चित्रमंदिरात झालेल्या या महोत्सवाच्या प्रारंभी ज्येष्ठ दशावतार कलावंत विठ्ठल गावंकर यांचा सत्कार करण्यात आला. या प्रसंगी माजी जिल्हाप्रमुख अशोक दळवी, तालुकाप्रमुख नारायण ऊर्फ बबन राणे, वेंगुर्ला तालुकाप्रमुख नितीन मांजरेकर, उपजिल्हा प्रमुख विनायक दळवी, महिला शहरप्रमुख भारती मोरे, शिवसेना पदाधिकारी तसेच विविध मान्यवर उपस्थित होते.
या कार्यक्रमात बोलताना माजी जिल्हाप्रमुख अशोक दळवी यांनी संजु परब हे मतदारसंघात सामाजिक व सांस्कृतिक उपक्रमांमधून नेहमीच सक्रिय राहतात, असे गौरवोद्गार काढले. तालुकाप्रमुख बबन राणे यांनीही संजु परब यांचे जनतेसाठीचे कार्य व सेवाभाव अधोरेखित केले.
माजी नगराध्यक्ष राजन पोकळे म्हणाले की, संजु परब यांच्या नेतृत्वाखाली शिवसेनेला मोठा यश मिळाले आहे. आमदार दीपक केसरकर यांच्या मार्गदर्शनाखाली व परब यांच्या नेतृत्वाखाली संघटनेची घोडदौड मतदारसंघात सुरू असून विविध स्थानिक स्वरूपाच्या संस्थांच्या निवडणुकांत त्यांना मोठे यश मिळाले आहे.
कार्यक्रमाचे सूत्रसंचालन विधानसभा प्रमुख प्रेमानंद देसाई यांनी केले. या प्रसंगी माजी नगरसेविका दीपाली सावंत, आबा केसरकर, सुजित कोरगावकर, निखिल सावंत, पूजा सोनुस्कर आदी मान्यवर व कार्यकर्ते उपस्थित होते.
दरम्यान, नाट्यमहोत्सवाच्या अखेरच्या दिवशी ऐतिहासिक नाटक ‘रायगडाला जेव्हा जाग येते’ याचे प्रयोग होणार असून यासाठी रसिकांमध्ये उत्सुकता आहे.
