वैभववाडी एडगाव येथे ७४ हजारचा गुटखा जप्त

नाकाबंदी दरम्यान वैभववाडी पोलिसांची कारवाई

वैभववाडी
वैभववाडी पोलिसांनी ७४ हजार रुपये किंमतीचा विमल गुटखा व गुटखा वाहतूक करणारी सुमारे ५० हजार रुपये किंमतीची मारुती ओमणी गाडी असा सुमारे १ लाख २४ हजार रुपये किंमतीचा मुद्दे माल जप्त केला आहे. याप्रकरणी उदयकुमार शिनू देवर रा. फोंडाघाट ता. कणकवली याच्यावर गुन्हा नोंद करण्यात आला आहे. ही कारवाई मंगळवारी दुपारी पावणे बारा वाजता एडगाव इनामदारवाडी फाट्याजवळ करण्यात आली. गेले चार पाच दिवस वैभववाडी पोलिसांनी एडगाव फाटा येथे नाकाबंदी सुरु केली आहे.

मंगळवारी सकाळपासून याठिकाणी पोलीस निरीक्षक मनोज सोनवलकर यांच्या सूचनेनुसार नाका बंदी करण्यात आली होती. दरम्यान दुपारी पावणे बारा वाजण्याच्या सुमारास वैभववाडीकडून उंबर्डेकडे जाणारी पांढऱ्या रंगाची मारुती ओमणी कंपनीची गाडी ड्युटीवर असलेले पोलिसांनी थांबावत गाडीची तपासणी केली. या गाडीत विमल गुटख्याच्या बॅग सापडल्या. पंचांसमक्ष गाडीतील गुटख्याच्या बॅग व मारुती ओमनी कंपनीची गाडी ताब्यात घेऊन वैभववाडी पोलीस ठाणे येथे आणून चालक उदयकुमार देवर याच्यावर अन्नसुरक्षा कायदा अंतर्गत गुन्हा दाखल करण्यात आला आहे. ही कारवाई पोलीस कॉन्स्टेबल सागर मासाळ, समीर तांबे, महिला पोलीस कॉन्स्टेबल दिपाली राठोड, संदीप राठोड, हरीष जायभाय, सहाय्यक पोलीस उपनिरीक्षक राजन पाटील, फक्रुद्दीन आगा यांच्या पथकाने केली. अधिक तपास वैभववाडी पोलीस करत आहेत.