कणकवलीतील महामार्गावरील खड्ड्यांवरून संताप! –

“खड्डे न बुजवल्यास स्वखर्चाने काम करणार” समीर नलावडे यांचा इशारा

कणकवली
कणकवली शहरातील राष्ट्रीय महामार्गाच्या सर्व्हिस रस्त्यांवरील भलेमोठे खड्डे येत्या रविवारी रात्रीपर्यंत बुजवा, अन्यथा सोमवारी सकाळी मी स्वतःच्या खर्चाने हे खड्डे बुजवणार, असा थेट इशारा माजी नगराध्यक्ष समीर नलावडे यांनी महामार्ग प्राधिकरणचे अभियंता श्री. साळुंखे यांना दिला आहे.

महामार्ग प्राधिकरणकडून दुर्लक्ष?

महामार्गाच्या दुतर्फा असलेल्या सर्व्हिस रस्त्यांची अवस्था गेल्या अनेक दिवसांपासून दयनीय झाली आहे. काही ठिकाणी पेव्हर ब्लॉक बसवून तात्पुरते काम करण्यात आले, मात्र तेही पुन्हा उध्वस्त झाले आहेत. नागरिकांना मोठ्या त्रासाला सामोरे जावे लागत असून, अपघाताची शक्यताही वाढली आहे.

गणेश चतुर्थीपूर्वी रस्ता डागडुजी आवश्यक

गणेश चतुर्थीच्या पार्श्वभूमीवर मोठ्या प्रमाणावर चाकरमानी जिल्ह्यात परतणार आहेत. कणकवली हे प्रमुख व्यापारी आणि वाहतूक केंद्र असून, येथे हजारो नागरिकांची रोजची वर्दळ असते. त्यामुळे या रस्त्यांची योग्य वेळी डागडुजी होणे आवश्यक आहे, अन्यथा नागरिकांच्या सुरक्षेला आणि प्रशासनाच्या प्रतिष्ठेला तडा जाऊ शकतो, असे नलावडे यांनी स्पष्ट केले.

प्रशासनाला ताशेरे

“महामार्ग प्राधिकरण हे जनतेच्या गरजांकडे दुर्लक्ष करत आहे. जर ते खड्डे बुजवू शकत नसतील, तर मग आम्ही नागरिकांनी पुढाकार घ्यायला हवा,” असे परखड मतही नलावडे यांनी व्यक्त केले. त्यांनी प्रशासनाच्या कामकाजावर नाराजी व्यक्त करत, योग्य कृती न झाल्यास प्रत्यक्ष कृती करण्याचा निर्धार केला आहे.