वन्य प्राणी यांनी केलेल्या नुकसानीचे तातडीने पंचनामे करावेत शेतकऱ्याची मागणी

दोडामार्ग

तालुक्यातील घोटगे गावात महिलेवर माकडाने हल्ला चढविल्याची घटना काही दिवसांपूर्वी घडली होती. यात सदर महिला गंभीर जखमी झाली असून वनविभागाने तिच्या कुटुंबीयांना नुकसान भरपाई द्यावी. व वन्य प्राण्यांनी केलेल्या शेतीच्या नुकसानीचे पंचनामे वेळेत पूर्ण करावेत अशी मागणी शेतकऱ्यांनी वनक्षेत्रपाल संदीप पाटील यांच्याकडे केली. वैद्यकीय अधिकाऱ्याकडून मेडिकल सर्टिफिकेट द्या. नुकसानभरपाई मिळण्या साठी आम्ही तसा प्रस्ताव पाठवतो असे आश्वासन संदीप पाटील यांनी उपस्थित शेतकऱ्यांना दिले आहे.

घोटगे येथे माकडांनी उपद्रव माजविला आहे. हे माकड मनुष्यांवर हल्ला करत असल्याच्या अनेक घटना तालुक्यात वारंवार घडत आहेत. काही दिवसांपूर्वी एका महिलेवर माकडाने हल्ला चढविल्याची घटना घडली होती. त्यांच्यापासून बचाव करण्यासाठी महिला पळत असता माकडाने मागून धावत येऊन तिच्या पाठीवर झडप घातली. यावेळी महिला दगडावर आपटली. या ती गंभीररित्या जखमी झाली. घरातील मंडळींनी तिला उचलून आणत उपचारासाठी रुग्णालयात दाखल केले.
वन्य प्राण्यांच्या हल्ल्यात गंभीर जखमी झालेल्यांना शासकीय अनुदान मिळत असल्याने ते अनुदान या महिलेलाही मिळावे यासाठी तिचे पती शंकर दळवी यांसह शेतकरी भरत दळवी, संदिप दळवी व इतर शेतकऱ्यांनी येथील वनक्षेत्रपाल संदीप पाटील यांची भेट घेतली. ती महिला दररोज शेतात काम करायची. मात्र माकडाच्या हल्ल्यात ती पूर्णपणे अंथरुणाशी खिळलेली असून तिच्या कुटुंबीयांना तात्काळ नुकसान भरपाई द्यावी अशी मागणी भरत दळवी यांनी केली. इतर शेतकऱ्यांनीही ही मागणी लावून धरली. यावेळी वैद्यकीय अधिकाऱ्यांचे मेडिकल सर्टिफिकेट कार्यालयात आणून द्या. सविस्तर प्रस्ताव आम्ही शासनास पाठवून देऊ व आपणास नुकसान भरपाई मिळवून देऊ असे यावेळी वनक्षेत्रपाल संदीप पाटील यांनी स्पष्ट केले.