सावंतवाडी :
मुक्ताई ॲकेडमीने सावंतवाडी येथील श्री.पंचम खेमराज काॅलेज हाॅलमध्ये विदयार्थ्यांसाठी कॅरम आणि बुद्धिबळ कोचिंग वर्कशॉपचे आयोजन केले. कार्यक्रमाचे अध्यक्ष, सिंधुदुर्ग जिल्हा शिक्षण प्रसारक मंडळाचे सदस्य श्री.जयप्रकाश सावंत आणि पाहुणे दै.कोकणसादचे पत्रकार श्री.विनायक गावस, गोवा येथील जीएसटी कस्टम सुपरीटेंडंट श्री.मधुसुदन मर्तल यांच्या शुभहस्ते आणि मुक्ताई ॲकेडमीचे अध्यक्ष, कॅरम प्रशिक्षक श्री.कौस्तुभ पेडणेकर व बुद्धिबळ प्रशिक्षक बाळकृष्ण पेडणेकर यांच्या उपस्थितीत वर्कशॉपचे उदघाटन करण्यात आले. सावंतवाडी, दोडामार्ग, वेंगुर्ला, कुडाळ, कणकवली येथील बेचाळीस मुला-मुलींनी या वर्कशॉपमध्ये सहभाग घेतला.
श्री.मधुसुदन मर्तल यांनी मनाच्या एकाग्रतेसाठी मुलांनी लहान वयात कॅरम व बुद्धिबळ खेळ खेळणे आवश्यक असल्याचे म्हटले. तसेच त्यांनी गायन, नृत्य, अभिनय या कलाप्रकारांकडे मुलांनी वळावं, असे आवाहन केले.
श्री.विनायक गावस यांनी मुलांसाठी सेमिनार, वर्कशॉप आणि स्पर्धा यांचं दरवेळी आयोजन करुन मुलांमध्ये आवड निर्माण करणा-या मुक्ताई ॲकेडमीचं कौतुक केले. पूर्वी खेळ, इतर उपक्रम यांचं मार्गदर्शन सहज मिळायचं नाही. आज मुक्ताई ॲकेडमीच्या माध्यमातून या प्रशिक्षणाचा फायदा या मुलांना होतो, हे कौतुकास्पद असल्याचं देखील त्यांनी नमूद केले.
बुद्धिबळ खेळातील माजी विश्वविजेता विश्वनाथन आनंद आणि विदयमान विश्वविजेता डी.गुकेश यांच्या सोबत खेळलेल्या बाळकृष्ण पेडणेकर याने मुलांना बुद्धिबळचे प्रशिक्षण दिले. जिल्ह्यातील ज्येष्ठ कॅरम खेळाडू, प्रशिक्षक श्री.कौस्तुभ पेडणेकर सरांनी मुलांना कॅरमचे प्रशिक्षण दिले. यावेळी ॲकेडमीची तेरा वर्षीय राष्ट्रीय कॅरम खेळाडू कु.साक्षी रामदुरकर हिचा सत्कार करण्यात आला. श्री.कौस्तुभ पेडणेकर यांनी पुढील महिन्यात कॅरम व बुद्धिबळ स्पर्धा घेण्यात येणार असल्याचे जाहीर केले. वर्कशॉपमध्ये सहभाग घेणा-या विदयार्थ्यांना प्रशस्तीपत्र देण्यात आली. ॲकेडमीची राष्ट्रीय बुद्धिबळ खेळाडू कु.गार्गी सावंत हीने कार्यक्रमाचे सूत्रसंचालन आणि आभार प्रदर्शन केले.
