इन्सुली येथे तरुणीचा पाण्यात बुडून मृत्यू…

बांदा

इन्सुली – कोठावळेवाडी येथील २५ वर्षीय सोनाली प्रभाकर गावडे हिचा मृतदेह आज सकाळी शेळ जमिनीतील पाण्यात तरंगताना आढळून आला. सोनाली ही इन्सुली येथील साऊथ कोकण डिस्टलरीज कंपनीत कामाला होती. वैद्यकीय अधिकाऱ्यांनी तिचा मृत्यू पाण्यात बुडून झाल्याचे निष्पन्न केले आहे.

मिळालेल्या माहितीनुसार, सोनाली दररोज सकाळी पायवाटेने झाराप – पत्रादेवी बायपासवर जाऊन कंपनीच्या वाहनाने कामावर जायची. काल, बुधवारी सकाळी ती नेहमीप्रमाणे जेवणाचा डबा घेऊन कामावर जाण्यासाठी निघाली होती, तर तिचे वडील शेर्ला येथील सॉ मिलवर कामासाठी गेले होते. मात्र, काल सायंकाळपर्यंत ती कामावर पोहोचली नसल्याचे स्पष्ट झाले. त्यानंतर कुटुंबीयांनी सर्वत्र तिचा शोध घेतला, परंतु ती आढळून न आल्याने रात्री उशिरा बांदा पोलीस ठाण्यात ती बेपत्ता असल्याची तक्रार दाखल करण्यात आली होती.

आज सकाळी, ज्या पायवाटेने ती कामावर जायची, त्याच पायवाटे लगतच्या शेळ जमिनीतील पाण्यात तिचा मृतदेह आढळून आला. घटनेची माहिती मिळताच पोलिसांनी तात्काळ घटनास्थळी धाव घेतली. मृतदेह शवविच्छेदनासाठी बांदा प्राथमिक आरोग्य केंद्रात आणण्यात आला. वैद्यकीय अधिकारी डॉ. गजानन सारंग यांनी सोनालीच्या मृतदेहाचे शवविच्छेदन केले. त्यांच्या अहवालानुसार, सोनालीचा मृत्यू पाण्यात बुडून झाल्याचे निष्पन्न झाले आहे.

यावेळी बांदा सहाय्यक पोलीस निरीक्षक गजेंद्र पालवे, पोलीस उपनिरीक्षक शिवराज झांजुर्णे आणि इतर पोलीस कर्मचारी उपस्थित होते. या घटनेमुळे गावडे कुटुंबावर दुःखाचा डोंगर कोसळला असून, संपूर्ण इन्सुली गावात शोककळा पसरली आहे.