अथक प्रयत्नानंतर अखेर बिबट्या जेरबंद…

सावंतवाड

मळेवाड-कोंडुरा-देऊळवाडी येथे काल चौघा ग्रामस्थांवर हल्ला करून गंभीर जखमी करणाऱ्या बिबट्याला अखेर वनविभागाने १० तासांच्या अथक प्रयत्नानंतर सायंकाळी ६ वाजता जेरबंद केले. हा बिबट्या पूर्ण वाढ झालेला असून तो निरोगी असल्याचे वनक्षेत्रपाल सुहास पाटील यांनी सांगितले. वैद्यकीय तपासणीनंतर त्याला नैसर्गिक अधिवासात सोडण्यात येणार आहे.

काल दुपारी बिबट्याने वस्तीत घुसून केलेल्या हल्ल्यात प्रभाकर मुळीक (वय ६०), सूर्यकांत सावंत (वय ६३), आनंद न्हावी (वय ५४) आणि पंढरी आजगावकर (वय ५२) हे गंभीर जखमी झाले होते. त्यांच्यावर गोवा मेडिकल कॉलेजमध्ये उपचार सुरू आहेत. या घटनेमुळे परिसरात भीतीचे वातावरण निर्माण झाले होते.ग्रामस्थांनी बिबट्या जखमी मुळीक यांच्या घरामागील बागेत लपल्याचा संशय व्यक्त केला होता. बागेभोवती पावसाचे पाणी साचल्याने बिबट्याला बाहेर पडणे कठीण होते. रविवारी उशिरापर्यंत बिबट्या दिसला नाही, परंतु आज सकाळी उप वनसंरक्षक मिलीश शर्मा यांच्या मार्गदर्शनाखाली वनविभागाने शोधमोहीम पुन्हा सुरू केली. सकाळी ८.३० वाजता वनविभागाची टीम जखमी मुळीक यांच्या घरामागील बागेत दाखल झाली. या मोहिमेत वनक्षेत्रपाल सुहास पाटील, आजगाव वनपाल पृथ्वीराज प्रताप, मळगाव वनपाल प्रमोद राणे, तसेच आजगाव, बांदा, मळगाव, माजगाव वन परिमंडळातील कर्मचारी आणि कुडाळ व सावंतवाडी येथील जलद कृती दलाचे कर्मचारी सहभागी झाले होते. शोधमोहीमेदरम्यान, हा बिबट्या मुळीक यांच्या बागेला लागून असलेल्या नदीजवळील मोटर पंपाच्या शेडमध्ये लपल्याचे आढळून आले.त्यानंतर

वनविभागाने बिबट्याला पकडण्यासाठी दोन पिंजऱ्यांचा वापर करून सापळा रचला. पंपाच्या शेडचा दरवाजा खालून कापून त्या ठिकाणी लोखंडी पिंजरा बसवण्यात आला. त्यानंतर शेडच्या पत्र्यावर चढून आतमध्ये पाणी ओतून बिबट्याला हुसकावले. यामुळे बिबट्या पिंजऱ्यात कैद झाला. साधारण १० तासांच्या या मोहिमेला सायंकाळी ६ वाजता यश मिळाले. या मोहिमेत स्थानिक ग्रामस्थांचे मोलाचे सहकार्य लाभले. बिबट्या बिथरलेल्या अवस्थेत असल्याने त्याची वैद्यकीय तपासणी करून त्याला नैसर्गिक अधिवासात सोडण्यात येणार असल्याचे वनक्षेत्रपाल पाटील यांनी सांगितले.

हल्ल्यानंतर ग्रामस्थांनी तात्काळ त्याला जेरबंद करण्याची मागणी वनविभागाकडे केली होती. या मागणीची दखल घेत मळेवाड कोंडुरा उपसरपंच हेमंत मराठे यांनी पालकमंत्री नितेश राणे यांच्याशी संपर्क साधून घडलेली घटना आणि ग्रामस्थांची मागणी त्यांच्या कानावर घातली होती. पालकमंत्र्यांनी या मागणीची दखल घेत वनविभागाला तशा सूचना दिल्या होत्या. वनविभागाने बिबट्याला जेरबंद केल्यानंतर श्री. मराठे यांनी वनविभागासह पालकमंत्री नितेश राणे यांचे आभार मानले.