सावंतवाडी :
सावंतवाडी येथील प्रसिद्ध व्यापारी, विठ्ठलभक्त आणि माजी मंत्री व विद्यमान आमदार दीपक केसरकर यांचे स्वीय सहाय्यक प्रसन्न उर्फ नंदू चंद्रकांत शिरोडकर (वय ६०) यांचे शुक्रवारी दुपारी राहत्या घरी हृदयविकाराच्या तीव्र धक्क्याने निधन झाले. त्यांना उपचारासाठी खासगी रुग्णालयात दाखल करण्यात आले होते. मात्र उपचाराआधीच त्यांचे निधन झाले.
आज श्री विठ्ठल रखुमाई मंदिरात आषाढी एकादशीच्या निमित्ताने आयोजित पालखी सोहळ्यात ते सहभागी झाले होते. आरती महाप्रसादानंतर दुपारी अस्वस्थ वाटू लागल्याने ते घरी गेले होते. याच दरम्यान त्यांना हृदयविकाराचा तीव्र झटका येऊन त्यांची प्राणज्योत मालवली.
सावंतवाडीतील सामाजिक, धार्मिक क्षेत्रात त्यांचे कार्य होते. सावंतवाडी विठ्ठल मंदिर रोडवर त्यांचे किराणा मालाचे दुकान आहे. त्यांच्या पश्चात पत्नी, दोन मुली, भाऊ, भावजय असा मोठा परिवार आहे. त्यांच्या निधनाने सावंतवाडी शहरासह संपूर्ण तालुक्यात हळहळ व्यक्त होत आहे.
