*ज्येष्ठ साहित्यिका, उपक्रमशील आदर्श शिक्षिका, सामाजिक कार्यकर्ती, निवेदिका, कथाकार पर्यावरण प्रेमी अनुपमा जाधव लिखित अप्रतिम काव्यरचना*
*मन*
मन कुठेही कसंही
भरकटत असतं
नदीसारखं खळाळत असतं
वाऱ्यासारखं भरारतं असतं
कधी कधी मन
घेऊन जातं उंच महालात
तर कधी
फाटक्या झोपडीत
मन होऊन जातं कधी
समुद्राच्या विक्राळ लाटा
तर कधी
डोंगर रानातल्या
हिरव्यागार पाऊलवाटा
मन आभाळात जातं
मातीवर येतं
झाडावर
फुलांवर बसतं
तर कधी
खडकावर आदळतं
पण मन तेच खरं
जे होत नाही
विजयांची उन्मत्त
आणि खचत नाही
पराभवांनी
अनुपमा जाधव, डहाणू
