*जागतिक साहित्य कला व्यक्तित्व विकास मंच तथा लालित्य नक्षत्रवेल समूहच्या सन्मा सदस्या ज्येष्ठ लेखिका कवयित्री भारती महाजन- रायबागकर लिखित अप्रतिम काव्यरचना*

*ईप्सित*

रविकिरणांचा स्वर्ण-पसारा, आवरता अवनीवरूनी

संध्यासमयी लक्षदीपांनी निघाला, आसमंत उजळूनी

सुवर्ण कळसाने मंडित, शिखर राऊळाचे

अवघ्या मंदिरावरी साम्राज्य, पवित्र केशरियाचे

शांत, सोज्वळ मुखचंद्रावर का,

अभ्र गांभीर्याचे

मनांगणीही का तसेच असावे, संभ्रम चिंतेचे

@भारती महाजन-रायबागकर

दीपमालेच्या प्रतिबिंबाची,

नक्षी किती सुंदर

का न तियेचेही प्रतिबिंब, उमटले मुद्रेवर?

संथ वायुलहरी कंपने, जलतरंगांची उठविती

मनसरीतेतील विचारलहरी, का स्पर्धा त्यांच्याशी करिती

हृदयावरती पसरले का, सावट तमसाचे?

दीपांसंगे दूर जावे का, तिमिर दुरितांचे?

भक्तीभावयुत श्रद्धा-संचित, करील ईप्सित पूर्ण

‘शुभम् भवतु’ वदे गंगामाई, मूक आशिर्वच देऊन

@भारती महाजन-रायबागकर

चेन्नई

©®या कवितेचे सर्व हक्क लेखिकेच्या स्वाधीन आहेत.