*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री ज्योत्स्ना तानवडे लिखित अप्रतिम काव्यरचना*

*’शुभंकरोति’*

शुभंकरोती म्हणता स्मरते

ओसरी अंगण माहेराचे

कानामध्ये घुमू लागती

बाबांचे स्वर मांगल्याचे ||

शुभ करणारी दीपज्योती

प्रकाशते घराघरास

अज्ञानाचा तम संपवून

उजळते मनामनास ||

पाढे पर्वचा घोकंपट्टी

सूत्र शिकविति अभ्यासाचे

सराव त्यांचा करून गेला

गणित पक्के आयुष्याचे ||

ध्यान करता शुभंकराचे

सूर ऐकता आरतीचे

दान मिळते सद्बुद्धीचे

संस्कार घडती शुभंकरोतिचे ||

*ज्योत्स्ना तानवडे. पुणे*