वेंगुर्ला :
मुंबई-गोवा महामार्गाच्या झाराप ते पत्रादेवी बायपासवर मळगाव कुंभार्ली येथे शनिवारी दोन दुचाकींची समोरासमोर धडक होऊन झालेल्या अपघातात गंभीर जखमी झालेले उभादांडा सुखटणकरवाडी येथील रहिवासी आणि तिरोडा ग्रामपंचायतचे ग्रामसेवक ज्ञानेश अंकुश करंगुटकर (वय ५४) यांचे आज शुक्रवारी पहाटे गोवा बांबुळी येथे उपचारादरम्यान निधन झाले. त्यांच्या निधनामुळे सर्वत्र हळहळ व्यक्त करण्यात येत आहे.ग्रामसेवक ज्ञानेश करंगुटकर हे आपल्या ताब्यातील दुचाकीने ओरोस येथून आपले शासकीय कामकाज आटोपून मुंबई-गोवा महामार्गाच्या झाराप पत्रादेवी बायपासने मळगावच्या दिशेने वळत होते. त्याचवेळी समोर येणाऱ्या दुचाकीची समोरासमोर धडक बसून हा अपघात झाला होता. अपघातात दोन्ही मोटरसायकलवरील चौघे जण गंभीर जखमी झाले होते. त्यांना गोवा बांबुळी येथे उपचारासाठी दाखल करण्यात आले होते.आज पहाटे पाच वाजण्याच्या सुमारास ज्ञानेश करंगुटकर यांचे उपचारादरम्यान निधन झाले. त्यांच्या पश्चात पत्नी, भाऊ, भावजय असा परिवार आहे. ज्ञानेश करंगुटकर यांचा शांत स्वभाव आणि मनमिळाऊ वृत्तीमुळे ते सर्वांचेच लाडके होते. त्यांच्या निधनाने तिरोडा पंचक्रोशीत शोक व्यक्त केला जात आहे.
