*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री डॉ.मानसी पाटील लिखित अप्रतिम काव्यरचना*
*वैशाख सावली*
*झाडाखाली पांथस्थ विसावे*
*वैशाख वणवा होतसे काहिली*
*वाटे हवीशी छाया शीतल*
*उष्णता तनुस नच साहिली….१*
*झाड ते ओशाळुनिया गेले*
*पर्ण नसती सावली द्याया*
*बघ कसा रे असमर्थ मी*
*उन्हाने तापली तव काया….२*
*फांदी एक ना उरली आज*
*कुरवाळाया प्रेमाने तुजला*
*मंद झुळूक ही नाही आज*
*जोजवता नच येई मजला….३*
*बघ सामोरी फुलला बहावा*
*लालबुंद गुलमोहर बहरला*
*देतील तुजला वैशाख सावली*
*ऐकुनी पांथस्थ गहिवरला…..४*
*आज वठलेला पुन्हा डवरशील*
*शाखा तुझिया नव्याने फुलतील*
*फुला फळांनी बहरून येशील*
*बंध आपुले कधी ना तुटतील..५*
*डॉ मानसी पाटील*
*मुंबई*
