पालकमंत्री यांचे कडून पत्रकार समितीच्या पदाधिकारी यांच्याशी चर्चा!!

संबंधितावर योग्य ती कारवाई करणार ना. नितेश राणे

दोडामार्ग

दोडामार्ग तालुक्यातील माटणे येथे पत्रकारांना अरेरावी करण्याची घटना अतिशय निंदनीय आहे. संशयित आरोपींवर कठोरात कठोर कारवाई करावी अशा सूचना पोलीस अधीक्षक सौरभ अग्रवाल यांना केल्या आहेत. या संबंधितांची गय केली जाणार नाही, त्यामुळे निश्चिंत राहा. प्रशासन जर कारवाई करण्यात कुचराई करत असेल असेल थेट माझ्याशी संपर्क साधा असे सिंधुदुर्ग जिल्ह्याचे पालकमंत्री ना.नितेश राणे यांनी दोडामार्ग तालुका पत्रकार समितीच्या पदाधिकाऱ्यांना सांगितले.

माटणे येथे तालुक्यातील तीन पत्रकार वृत्तांकन करण्यासाठी गेले होते. येथील पूर्वाचार देवस्थान जवळील काट्याजवळ रस्त्यालगतच पत्रकारांना मोठ्या प्रमाणात माती साठा करून ठेवल्याचे दिसले. त्यामुळे पत्रकारांनी तेथे जात फोटो काढण्याचा प्रयत्न केला. खासगी जमिनीत हा मातीसाठी असल्याने पत्रकारांनी जमिनीच्या गेटबाहेर उभे राहून मातीचे फोटो टिपण्याचा प्रयत्न केला. याचवेळी संशयित नवनाथ नाईक हा त्याच्या कारने तेथे आला व एका पत्रकाराला फोटो टिपण्यास मज्जाव केला. तसेच पत्रकारांना अर्वाच्च भाषेत शिवीगाळ करण्यास व धक्काबुक्की करण्यास सुरुवात केली. गेट बाहेर उभ्या असलेल्या पत्रकारांना धक्काबुक्की करत गेटच्या आत नेले. त्यानंतर विठ्ठल नाईक हा लाकडी दांडा हातात घेऊन पत्रकारांच्या अंगावर धावून येऊ लागला. तसेच ठार मारण्याची धमकी देऊन शिवीगाळ करू लागला.

या घटनेविरुद्ध तालुका पत्रकार समिती आक्रमक झाली व येथील पोलीस ठाण्यात संशयित बाप-लेकाविरुद्ध पत्रकार संरक्षण कायदे अंतर्गत गुन्हा दाखल केला. पालकमंत्री नितेश राणे यांचा सिंधुदुर्ग जिल्हा दौरा होता. यावेळी तालुका पत्रकार समितीच्या पदाधिकाऱ्यांनी पालकमंत्र्यांची भेट घेत सविस्तर चर्चा केली व याबाबतीत निवेदन देत पत्रकारांवर अरेरावी करणाऱ्या बाप-लेकावर कडक कारवाई करावी अशी मागणी केली. त्यांच्यावर कडक कारवाई करण्याच्या सूचना आपण पोलीस अधीक्षक सौरभ अग्रवाल यांना दिल्या असल्याचे त्यांनी स्पष्ट केले. यावेळी तालुका पत्रकार समितीचे अध्यक्ष संदीप देसाई, खजिनदार रत्नदीप गवस, जिल्हा कार्यकारिणी सदस्य सुहास देसाई, लवू म्हाडेश्वर, संदेश देसाई, ओम देसाई, समीर ठाकूर, लवू परब उपस्थित होते.

चौकट
पत्रकार संघाचे जिल्हाध्यक्ष उमेश तोरसकर यांनी आपणास सर्व हकीकत सांगितली आहे. संशयित पोलीस ठाण्यात शिवीगाळ करतो अन् पोलीस प्रशासन कसं काय शांत राहते? याबाबत आपण पोलीस अधीक्षक सौरभ अग्रवाल यांच्याशी बोललो असून संशयित आरोपींवर कारवाई करण्याच्या सूचना त्यांना केल्या आहेत असे त्यांनी स्पष्ट केले.