*जागतिक साहित्य कला व्यक्तित्व विकास मंचचे सन्मा सदस्य कविवर्य वैद्यराज भूपाल त्र्यंबक देशमुख लिखित अप्रतिम काव्यरचना*

*📖📖ग्रंथभेट📖📖* 

शाली चिकार झाल्या भेटीत ग्रंथ द्यावा

सन्मान साधतांना मानात ग्रंथ द्यावा ।।१।।

पुष्पा सुगंध शोभा ते का उगा खुडावे

शब्दातल्या फुलांना साधा सुपंथ द्यावा ।।२।।

जागा नकोच रागा , नाना नकोच कोप ?

ती आढ्यता जळाया शब्दाग्निमंथ द्यावा ।।३।।

वृक्षा नको चिराया सन्मानचिन्ह द्याया

ग्रंथा विशुद्ध देण्या धीत सुमंत यावा ।।४।।

मोडा रिवाज सारे सत्कार क्रोध लोभ

रुढीस तोडणारा उद्दंड संत व्हावा ।।५।।

धीत =बुद्धीत , सुमंत=दुसर्‍यास सुख देणारा वा उत्तम स्वभावाचा वा उत्तम मनाचा , अग्निमंथ=अरणीवृक्ष , वन्ही पेटवण्यासाठी याचे काष्ठ घासून वापरीत. याचेपासून अरणीयंत्र तयार करत , ज्याचा उपयोग यज्ञात वन्ही पेटवण्यासाठी करत असत.

*©सर्वस्पर्शी*

©कविवर्य वैद्यराज भूपाल त्र्यंबक देशमुख.

नाशिक ९८२३२१९५५०