कांदळगावच्या श्री देव रामेश्वर देवस्थानचा ९ ते १४ फेब्रुवारीला वेशी फिरणे कार्यक्रम…
मालवण
कांदळगाव येथील श्रीदेव रामेश्वर देवस्थानचा पूर्वापार परंपरेनुसार चालत आलेला स्वयंभू देव रामेश्वर पालखी, तरंग, राणे – परब मानकरी आणि रयत मंडळींसह (वेशी फिरणे) कार्यक्रम ९ ते १४ फेब्रुवारी या कालावधीत होणार आहे.
९ रोजी रामेश्वर मंदिर कांदळगाव येथून दुपारनंतर कोळंब मांगरी येथे प्रस्थान, १० रोजी कोळंब मांगरी येथील देव महापुरुष येथे दुपारी महाप्रसाद, दुपारनंतर न्हिवे येथे प्रस्थान, ११ रोजी न्हिवे येथे दुपारी महाप्रसाद, दुपारनंतर महान येथे प्रस्थान, १२ रोजी दुपारी महान गांगेश्वर मंदिर येथे महाप्रसाद, दुपारनंतर कांदळगाव रवळनाथ मंदिरकडे प्रस्थान, १३ रोजी सकाळी रवळनाथ मंदिरातून कांदळगाव साखरवाडी येथे प्रस्थान, तेथून पुन्हा माघारी येताना परबवाडी मोठ्या तुळशीजवळ महाप्रसाद, दुपारनंतर रवळनाथ मंदिराकडे प्रस्थान, १४ रोजी रवळनाथ मंदिर येथून राणेवाडी येथे प्रस्थान, दुपारी राणेवाडी मध्यवर्ती मोठी तुळस येथे महाप्रसाद, दुपारनंतर रामेश्वर मंदिर येथे रवाना, रात्री रामेश्वर मंदिर येथे पाच दिवसीय वेशी फिरणे कार्यक्रमाची रीतीरिवाजानुसार सांगता करण्यात येणार आहे. या कार्यक्रमात भाविकांनी मोठ्या संख्येने सहभागी व्हावे असे आवाहन कांदळगाव रामेश्वर देवस्थान तर्फे करण्यात आले आहे.
