महाडिबीटी पोर्टलवर शिष्यवृत्ती अर्ज करण्याचे आवाहन
सिंधुदुर्गनगरी
सामाजिक न्याय व विशेष सहाय्य विभाग व इतर मागास बहुजन कल्याण विभागामार्फत शैक्षणिक वर्ष २०२४-२५ करिता भारत सरकार मॅट्रिकोत्तर शिष्यवृत्ती योजना, मॅट्रिकोत्तर शिक्षण फी परिक्षा फी प्रदाने योजना, राजर्षी छत्रपती शाहू महाराज गुणवत्ता शिष्यवृत्ती योजना, व्यावसायिक पाठ्यक्रमाशी संलग्न वसतीगृहातील विद्यार्थ्यांना निर्वाह भत्ता योजना इ. योजनेचे नवीन अर्ज नोंदणी करणे व नुतनीकरण करण्यासाठी अनुसूचित जाती, प्रवर्गातील विद्याथ्यांनी ऑनलाईन पध्दतीने महाडिबीटी पोर्टलवर शिष्यवृत्ती अर्ज करण्याचे आवाहन समाज कल्याण सहाय्यक आयुक्त संतोष चिकणे यांनी केले आहे.
समाज कल्याण विभागामार्फत दि.२५ जुलै २०२४ पासून महाडिबीटी पोर्टल विद्यार्थ्यांसाठी कार्यान्वित आहे. तरी विद्यार्थ्यांनी शिष्यवृत्ती ऑनलाईन अर्ज भरण्यासाठी https://mahadbt.maharashtra.gov.in या संकेत स्थळावर भेट दयावी. तसेच जिल्हयातील कनिष्ठ, वरिष्ठ व व्यावसायिक महाविद्यालयांच्या प्राचार्यानी आपल्या महाविद्यालयात प्रवेशित योजनेस पात्र विद्याध्यांचे ऑनलाईन भरण्यासंदर्भात समान संधी केंद्राद्वारे कार्यशाळा घेवून परिपत्रक, शाळा / महाविद्यालयांच्या नोटीस बोर्डवर दर्शनी भागात लावणे तसेच पलेक्स / होडींग महाविद्यालयाच्या आवारात लावण्याचे आवाहन जिल्ह्याचे सहाय्यक आयुक्त समाज कल्याण कार्यालयामार्फत करण्यात येत आहे.
विहित वेळेत विद्यार्थ्यांचे अर्ज दि.३१ जानेवारी २०२५ अखेर भरून घेण्याची जबाबदारी संबधित महाविद्यालयाची राहिल. तरी अनु. जाती, विद्यार्थ्यांचे शिष्यवृत्ती अर्ज वेळेवर नोंदणी करून घेण्याबाबत व महाविद्यालय स्तरावर अर्जाची छाननी करून प्रस्ताव मंजुरीसाठी सहाय्यक आयुक्त, समाज कल्याण, सिंधुदुर्ग कार्यालयाकडे वेळेवर पाठविण्याबाबत महाविद्यालयांना सूचित करण्यात येत आहे. या योजनेपासून मागासवर्गीय प्रवर्गातील विद्यार्थी वंचित राहिल्यास यास संबंधित महाविद्यालयातील प्राचार्य जबाबदार राहतील असे प्रसिध्दी पत्रकात म्हटले आहे.