सिंधुदुर्ग जिल्हा पोलिस दलाच्यावतीने ‘रेझिंग डे’ सप्ताहाच्या अनुषंगाने तीन दिवसीय प्रदर्शनाचे आयोजन

कामकाजाची नागरिकांना देणार माहिती

सिंधुदुर्ग :

सिंधुदुर्ग जिल्हा पोलिस दलाच्यावतीने ‘रेझिंग डे’ सप्ताहाच्या अनुषंगाने पोलिस दलाची व पोलिसांच्या कामकाजाची नागरिकांना माहिती होण्याकरिता ६ ते ८ जानेवारी या कालावधीत कणकवली, कुडाळ, सावंतवाडी येथे तीन दिवसीय प्रदर्शन आयोजित करण्यात आलेले आहे.

६ जानेवारी रोजी कणकवली बसस्थानकाजवळ, ७ जानेवारी रोजी कुडाळ पोलिस ठाणे समोरील पटांगण, ८ जानेवारी रोजी जगन्नाथ भोसले उद्यान, सावंतवाडी येथे सकाळी १० ते सायंकाळी ७ या कालावधीत हे प्रदर्शन सुरू राहणार आहे.

या प्रदर्शनात श्वानपथक, बॉम्ब शोधक व नाशक पथक, सायबर गुन्हे सुरक्षा, सागरी सुरक्षा, अग्निशस्त्रे, फॉरेन्सिक युनिट, महिला साहाय्य, वाहतूक नियमन व नियंत्रण, पोलिस दलाची रचना व कार्यपद्धती याबाबत माहिती देण्यात येणार आहे. या प्रदर्शनास जास्तीत जास्त नागरिक व विद्यार्थी यांनी भेट देऊन प्रदर्शनातून माहिती घेण्याचे आवाहन सिंधुदुर्ग जिल्हा पोलिस दलाच्यावतीने करण्यात आले आहे.