अखिल भारतीय विद्यार्थी परिषद कोकण प्रांत अधिवेशनाचे उद्या उद्घाटन

मत्स्योद्योग व बंदर विकासमंत्री ना. नितेश राणे यांची उपस्थिती

सावंतवाडी येथे एक हजार प्रतिनिधी येणार

सावंतवाडी

अखिल भारतीय विद्यार्थी परिषदेचे कोकण प्रांत अधिवेशन दि २७ ते २९ डिसेंबर २०२४ या कालावधीत अहिल्याबाई होळकर नगर, भोसले नॉलेज सीटी सावंतवाडी येथे संपन्न होत आहेत. या अधिवेशनाचे उद्घाटन पुण्यश्लोक बापुसाहेब महाराज सभागृहामध्ये शुक्रवार दि. २७ डिसेंबर रोजी सकाळी ११.१५ वाजता करण्यात येणार आहे. अधिवेशनाचे उद्घाटन विद्यापीठ अनुदान आयोगाचे सचिव प्रा. मनिष जोशी यांचे हस्ते होणार आहे. यावेळी कार्यक्रमाला प्रमुख अतिथी मत्स्यव्यवसाय व बंदरे विकास मंत्री नितेश राणे असणार आहेत.

या अधिवेशनामध्ये अभाविप परिवर्तनकारी छात्र आंदोलन, आनंदमय सार्थक छात्र जीवन, विकसित कोकण आणि समृदध कोकण ही भाषण सत्रे होणार आहेत. तसेच विविध प्रस्तावांवर चर्चा करून प्रस्ताव संमत केले जातील.

तर या अधिवेशनाच्या निमित्ताने दि. २८ डिसेंबर रोजी सांयंकाळी ४ वाजता राजवाड्यापासून भव्य शोभायात्रेचे आयोजन करण्यात आले आहे. ही शोभायात्रा शहरामध्ये प्रमुख रस्त्यांवरून जात गांधी चौक येथे पोचल्यावर तेथे सायंकाळी जाहीर सभेचे आयोजन करण्यात आले आहे. या जाहीर सभेमध्ये प्रमुख वक्ता अभाविपच्या राष्ट्रीय मंत्री कु. शिवांगी खरवाल, दिल्ली ह्या मार्गदर्शन करणार आहेत.

या अधिवशेनामध्ये तीन परिसंवाद होणार असून त्यामध्ये दि. २७ डिसेंबर रोजी विद्यापीठ अनुदान आयोगाचे सचिव प्रा.मनिष जोशी यांच्या उपस्थितीत “नवीन शैक्षणिक धोरण” या विषयावर होणार आहे. यामध्ये कोकण प्रांतातील महाविद्यालयाचे प्राचार्य आणि प्राध्यापक उपस्थित राहणार आहेत.

तसेच दि. २८ डिसेंबर रोजी कोकण सागरी सीमा सुरक्षा या परिसंवादामध्ये अनिकेत कोंडाजी, रविकिरण तोरसकर, ह्यांच्या सह या विषयात अभ्यास असणारे तज्ञ उपस्थित रहाणार आहेत. तसेच “ समृद्ध कोकण – विकसित कोकण” या विषयावर दुसरा परिसंवाद होईल. यामध्ये प्रा. मंदार भानुशे, गुरु राणे, श्रीकृष्ण परब, सुनिल उकीडवे, मनिष दळवी असे तज्ञ व्यक्ती या परिसंवादात सहभागी होणार आहेत. या परिसंवादात व्यापार उद्योग आवश्यक सुविधा, शेती, बांबु व फळ प्रक्रिया, बँकिंग व नविन तंत्रज्ञान या विषयांवर चर्चा करण्यात येणार आहे.

तसेच या अधिवेशनामध्ये दि. २९ रोजी अभाविप पूर्व कार्यकर्त्यांचे संमेलन होणार आहे. या संमेलनाला माजी मंत्री विनोदजी तावडे, माहिती तंत्रज्ञान व सांस्कृतिक कार्य मंत्री आशिष शेलार, अभाविपचे राष्ट्रीय सह संघटनमंत्री देवदत्त जोशी हे उपस्थित राहणार आहेत.