वेंगुर्ल्यात १ डिसेंबर रोजी तालुका वाचक स्पर्धा

वेंगुर्ले

सिंधुदुर्ग जिल्हा ग्रंथालय संघ व येथील नगर वाचनालय यांच्या संयुक्त विद्यमाने वेंगुर्ले तालुका वाचक स्पर्धा १ डिसेंबर रोजी सकाळी १० वाजता होणार आहे. नगर वाचनालयाच्या लक्ष्मीबाई कोरगावकर सभागृहात होणाऱ्या या स्पर्धेसाठी ‘जयवंत दळवी यांची कोणतीही साहित्यकृती’ यावर १० मिनिटांमध्ये परीक्षण सादर करायचे आहे. या स्पर्धेत सहभाग घेणारे वाचक स्पर्धक हे वेंगुर्ले तालुक्यातील एखाद्या वाचनालयाचा नियमित वाचक असल्याचा दाखला आवश्यक आहे. या स्पर्धेतील प्रथम तीन क्रमांकांना ५००, २५०, १५० रुपये अशी पारितोषिके ठेवण्यात आली आहेत. वेंगुर्ले शहराबाहेरून येणाऱ्या स्पर्धकाला स्पर्धेला येण्याजाण्यासाठी १०० रुपये प्रवास खर्च दिला जाणार आहे. स्पर्धेसाठी वाचनालयाच्या माध्यमातून २९ नोव्हेंबरपर्यंत नाव नोंदणी करायची आहे. . अधिक माहितीसाठी वेंगुर्ले नगर वाचनालय येथे संपर्क साधावा, असे आवाहन संस्थेचे कार्याध्यक्ष अनिल सौदागर व कार्यवाह कैवल्य पवार यांनी केले आहे.