*प्रा. हेमंत सामंत यांनी केले मार्गदर्शन*

मुंबई (गुरुदत्त वाकदेकर) :

नवीन शैक्षणिक धोरणावर आधारित “आंतरराष्ट्रीय संबंधांवर करिअर” ह्या विषयावर डी. जी. रूपारेल महाविद्यालयाच्या राज्यशास्त्र विभागाने २१ ऑक्टोबर २०२४ रोजी प्रा. हेमंत सुधाकर सामंत यांनी मार्गदर्शन केले. या सत्रात क्षेत्रातील विविध करिअर संधींवर प्रकाश टाकण्यात आला तसेच समारोपाच्या प्रसंगी विद्यार्थ्यांना अभ्यासक्रम प्रमाणपत्रांचे वाटप करण्यात आले.

प्रा. हेमंत सामंत यांनी आंतरराष्ट्रीय संबंधांच्या विस्तृत व्याप्तीवर भर दिला. त्यांनी मुत्सद्देगिरी आणि परराष्ट्र सेवा, धोरण विश्लेषण आणि संशोधन, आंतरराष्ट्रीय मदत आणि विकास, बुद्धिमत्ता आणि जोखीम व्यवस्थापन, मानवी हक्क आणि वकिली, जागतिक व्यापार आणि स्थानिक व्यापार, शैक्षणिक आणि संशोधन, पत्रकारिता आणि आंतरराष्ट्रीय कायदा अशा विविध क्षेत्रांमध्ये करिअर घडवण्यासाठी तसेच यशस्वी होण्यासाठी विद्यार्थ्यांना भाषा प्रवीणता (एकाधिक भाषा), सांस्कृतिक क्षमता, विश्लेषणात्मक आणि समस्या सोडवण्याचे कौशल्य, प्रभावी संवाद आणि वाटाघाटी, जागतिक समस्या ज्ञान आणि अनुकूलता यासह अनेक कौशल्ये आत्मसात करणे का आवश्यक आहेत हे उदाहरणासह समजावून सांगितले.

कार्यक्रमाचे समन्वयक प्रा. प्रदिप जानकर, प्रा. नितेश राठोड यांनी विद्यार्थ्यांचे अभिनंदन केले. उपप्राचार्या डॉ. वैशाली जावळेकर यांनी विद्यार्थ्यांना आगामी अभ्यासक्रम शोधण्यासाठी प्रोत्साहित केले, “आम्ही पुढील वर्षी असेच अभ्यासक्रम सुरू करण्याचा विचार करत आहोत आणि मी विद्यार्थ्यांना या संधींचा लाभ घेण्याचे आवाहन करते.”

डी. जी. रुपारेल महाविद्यालयाच्या राज्यशास्त्र विभागाच्या या उपक्रमाचा उद्देश विद्यार्थ्यांना आंतरराष्ट्रीय संबंध करिअरसाठी सक्षम करणे हा आहे.