*जागतिक साहित्य कला व्यक्तित्व विकास मंचच्या सन्माननीय सदस्या ज्येष्ठ कवयित्री विजया केळकर लिखित अप्रतिम काव्यरचना*
*पार्वतीसुत*
पार्वतीच्यासुता तुला शिवाचं वरदान
गाता तुझे नाम हेरंबा हरावे देहभान||
व्हावे आगमन ढोल-ताशांच्या गजरात
नाचावे उत्साहाने चाले लेझिम जोरात
सुबक मूर्ती मखरात करु विराजमान ||
शोर्य युद्धातले,पाही अचंभित उमापती
स्वपुत्रा छेदिले जाणता आला काकुळती
गजमुखा तुला दिधला अग्रपूजेचा मान ||
दिव्य तुझे रुप, लंबकर्ण लंबोदरा
मातृपितृभक्त,प्रिय कार्तिकेय सहोदरा
एकदंता शोभे तव शुंडा लंबायमान ||
रुळे मोहकसा जपाकुसुमांचा हार
रुचकर मोदकांची तुला आवड फार
दुर्वांकुर सोंडेत खोविले शिरी शमीपान ||
विजया केळकर ______
नागपूर
