*जागतिक साहित्य कला व्यक्तित्व विकास मंचच्या सन्माननीय सदस्या ज्येष्ठ कवयित्री विजया केळकर लिखित अप्रतिम काव्यरचना*
*मित्र-मैत्रिणींशी कराव्यात गप्पा*
जाणावा नात्यातला गोडवा
मनास पडलेला प्रश्न सोडवा
कोणावर नका देऊ उगा ठप्पा
मित्र-मैत्रिणींशी कराव्यात गप्पा…
चुकीने चविष्ट पदार्थ व्हावा खारट
यावे अगांतुक दुःखाचे सावट
पार करण्या कठीण काळाचा टप्पा
मित्र-मैत्रिणींशी कराव्यात गप्पा…
पाऊस-वारा खुलवी मोरपिसारा
वाहत्या पाण्या सावरी किनारा
उघडण्या मनाचा बंद कप्पा
मित्र-मैत्रिणींशी कराव्यात गप्पा…
धाग्याधाग्याने गुंफण्या सुंदर वीण
घालविण्या मरगळ नि सारा शीण
गवसावी ऐसी चीज शोधता चप्पा-चप्पा
मित्र-मैत्रिणींशी कराव्यात गप्पा…
विजया केळकर_________
नागपूर (हैद्राबाद )
