*जागतिक साहित्य कला व्यक्तित्व विकास मंचचे सन्मा.सदस्य कवी शशांक देशमुख लिखित अप्रतिम अष्टाक्षरी काव्यरचना*
*शीर्षक:- श्रावण आला…*
मास पाचवा पावन
आला श्रावण श्रावण…
कसे नंदी-बैलावरी
शिव आरूढले छान…।। १ ।।
उपरांत आषाढाच्या
लागे सणांची चाहूल…
लड श्रावणी सणांची
जनीमनी कुतूहल…।। २ ।।
रिमझिमत्या सरींची
चाले उघड-झापड…
वर्षाराणी मधुभाषी
कधी दाविते अकड…।। ३ ।।
आली वसुंधरा राणी
साज शृंगार करून…
ल्याली नववधू जशी
शालू हिरवा नेसून…।। ४ ।।
पाठी नागपंचमीच्या
सण रक्षाबंधनाचा…
मधे दिन स्वातंत्र्याचा
सर्व जनां आवडीचा…।। ५ ।।
सणासुदीची हो माळा
फुलविते गोतावळा…
रम्य सुंदर सोहळी
सजे आनंदाचा मेळा…।। ६ ।।
✍️शशांक दिनकरराव देशमुख©®
चांदुरबाजार, जि. अमरावती
(महाराष्ट्र राज्य) – ४४४ ७०४
मो. क्र. ९९२३५३६३२५
