*जागतिक साहित्य कला व्यक्तित्व विकास मंचच्या सन्माननीय सदस्या ज्येष्ठ लेखिका कवयित्री ज्योत्स्ना तानवडे लिखित अप्रतिम अभंग रचना*
*सावळे परब्रह्म*
झाली वैकुंठ पंढरी | क्षेत्र चंद्रभागे तीरी ||
सावळा बने श्रीहरी | उभा ठाके विटेवरी ||१||
क्षेत्र पावन भूवरी | विठुरायाची नगरी ||
त्रिखंडात तिच्या परी | नाही दुसरी पंढरी ||२||
अगा वैष्णवांच्या देवा | तुझ्या करूणेचा ठेवा ||
वाटे माहेर या जीवा | काय थाट म्या वर्णावा ||३||
भक्तांसाठी धाव घेशी | भक्तांच्या अधीन होशी ||
अभंग तारुन नेशी | भक्ती श्रेष्ठ अविनाशी ||४||
देई ऐसे वरदान | दूर सारावे अज्ञान ||
मिळविता आत्मज्ञान | शुद्धमती देई भान ||५||
आत्मबुद्धीसी सोडावे | भक्तीधन त्वा जोडावे||
सार्थक जन्माचे व्हावे | मुखी नाम सदा घ्यावे ||६||
*ज्योत्स्ना तानवडे.*
पुणे
