*जागतिक साहित्य कला व्यक्तित्व विकास मंचचे सन्मा सदस्य कवी शशांक देशमुख लिखित अप्रतिम काव्यरचना*
*शीर्षक:- निवडुंग…*
काया ओबडधोबड
रूप कुरूप काटेरी…
परी माया आभाळाची
जपे निवडुंग उरी…।। १ ।।
भासे आकार, विकार!
जसा वृक्ष हो शापित…
धग सोसूनही रणी
करे अस्तित्व स्थापित…।। २ ।।
वृक्ष तरूवर मोठे
करे जिथे पाणी-पाणी…
वदे निवडुंग तिथे
आबादानीची कहाणी…।। ३ ।।
जपे औषधीय गुण
परी मौन ते राखून…
व्याध्या विकार वारण्या
देई मोठे योगदान…।। ४ ।।
म्हणतो झुडूप कोणी
कुणी तो काट्यांची खाण…
थोडा संघर्षही त्याचा
बघा एकदा निदान…।। ५ ।।
देतो शिकवण आम्हां
निवडुंग तो पहाणा…
सांगे सोडून बहाणे
द्यावे तोंड संकटांना…।। ६ ।।
✍️शशांक दिनकरराव देशमुख©®
चांदुरबाजार, जि. अमरावती
(महाराष्ट्र राज्य) – ४४४ ७०४
मो. क्र. ९९२३५३६३२५
