सिंधुदुर्गनगरी

लोककला व पथनाट्य यांची निवडसूची तयार करण्यासाठी  माहिती व जनसंपर्क महासंचालनालयामार्फत संबंधित क्षेत्रातील अनुभवी संस्थाकडून विहीत नमुन्यात दि. 1 जानेवारी 2021 पासून अर्ज मागविण्यात आले आहेत. इच्छुक संस्थांनी जिल्हा माहिती अधिकारी, जिल्हा माहिती कार्यालय, सिंधुदुर्ग यांच्याकडे विहीत नमुन्यातील अर्ज आवश्यक कागदपत्रासह दि. 1 जानेवारी 2021 ते 21 जानेवारी 2021 पर्यंत मिळतील अशा बेताने पाठवावेत, असे आवाहन माहिती व जनसंपर्क महासंचालनालय, मंत्रालय, मुंबई यांच्यामार्फत करण्यात आले आहे.

            शासनाच्या लोककल्याणकारी योजनांची माहिती सर्वसामान्य लोकांपर्यंत पोहोचविण्यासाठी लोककला व पथनाट्य (उदाहरणार्थ गण-गवळण, अभंग, पोवाडे, पथनाट्य, बहुरूपी, भारूड इत्यादी) निवडसूची तयार करण्याचे काम सुरू आहे. इच्छुक संस्थांनी जिल्हा माहिती कार्यालय, सिंधुदुर्ग यांच्याकडे संपर्क साधून अर्जाचा नमुना व माहितीपत्रक प्राप्त करून घ्यावे. अथवा अर्जाचा नमुना व माहितीपत्रक www.maharashtra.gov.in आणि dgipr.maharashtra.gov.in या संकेतस्थळावरही उपलब्ध आहे.

            पथकाला विविध विषयांवर (शासकीय योजनांसह) कार्यक्रम/पथनाट्य करण्याचा अनुभव असावा. पथक किमान दहा जणांचे असावे. यामध्ये स्त्री-पुरूष, वादक यांचा समावेश असावा. लोककला/पथनाट्य पथक ज्या जिल्ह्यातील असेल त्याच जिल्ह्यातून अर्ज सादर करावा. केंद्र सरकारच्या गीत व नाट्य विभागाकडे नोंदणीकृत असल्यास प्राधान्य. संस्थेकडे स्वत:ची ध्वनीक्षेपण यंत्रणा असणे अपेक्षित आहे.