*देश विदेशातील कवींचा असणार सहभाग*
मुंबई (गुरुदत्त वाकदेकर) :
पुण्यातील भिडेवाडा देशातील मुलींची पहिली शाळा, स्त्री शिक्षणाचे उगमस्थान, स्त्री मुक्ती चळवळीचा जाज्वल्य इतिहासाचा साक्षीदार आहे. हा विषय घेऊन ‘भिडे वाडा बोलला’ या सुप्रसिद्ध कवितेचे कवी प्राथमिक शिक्षक विजय वडवेराव यांनी “भिडे वाडा बोलला” या राष्ट्रीय काव्य स्पर्धेचे आयोजन केले आहे. या स्पर्धेत भारतातीलच नव्हे तर विदेशातील कवी देखील सहभागी होण्याची शक्यता आहे.
स्त्री शिक्षणाच्या उगम स्थानाची, बहुजनांच्या ऐतिहासिक प्रेरणा स्थळाची जी इतकी वर्षे दुरावस्था होती, तेव्हापासून ते आता भिडे वाड्याचे होऊ घातलेले भव्य राष्ट्रीय स्मारक इथवर भिडे वाड्याचा आत्मकथनपर प्रवास या रचनेत अपेक्षित आहे. भिडे वाडा (देशातील मुलींची पहिली शाळा) स्त्री शिक्षणाचे उगमस्थान, स्त्री मुक्ती चळवळीचा आशय केंद्रबिंदू असलेली रचना असावी. स्पर्धेसाठी प्रवेश विनामूल्य आहे. अक्षरछंद, वृत्तबद्ध कविता, गजल, पोवाडा, भारुड, मुक्तछंद अशा कोणत्याही काव्य प्रकारात स्वरचित ५० ओळींपर्यंतची रचना १ मार्च २०२४ पर्यंत पाठवू शकता.
स्पर्धेतील विजेत्यांना रोख पारितोषिके देण्यात येणार आहे. प्रथम क्रमांकाला पाच हजार रोख, द्वितीय क्रमांकाला तीन हजार रुपये रोख तर तृतीय क्रमांकाला दोन हजार रुपये रोख तसेच उत्तेजनार्थ पारितोषिके ३ जणांना प्रत्येकी एक हजार रुपये रोख, सन्मानचिन्ह, शाल, पुस्तक असे बक्षीस देण्यात येणार आहे. स्पर्धेचा पारितोषिक वितरण सोहळा दि. ३१ मार्च २०२४ रोजी महाराष्ट्र साहित्य परिषद सभागृह, टिळक रोड, पुणे येथे सायं. ५ वाजता होणार आहे.
आलेल्या कवितांमधून काही निवडक कवितांचा “भिडे वाडा बोलला” या प्रातिनिधिक काव्यसंग्रहात समावेश करणार असल्याचे काव्यसंग्रहाचे संपादक आणि स्पर्धेचे आयोजक प्राथमिक शिक्षक कवी विजय वडवेराव यांनी सांगितले. स्पर्धेच्या अधिक माहितीसाठी आणि आपली रचना पाठवण्यासाठी विजय वडवेराव 9021097448 या व्हॉट्सॲप क्रमांकावर किंवा vijaywadverao@gmail.com या ईमेल आयडीवर संपर्क साधावा.
