हिंदू खाटीक समाज आर्थिक महामंडळाची स्थापना

स्वयंरोजगारासाठी विविध कर्ज व अनुदान योजना

सिंधुदुर्गनगरी

 जिल्ह्यातील अनुसूचित जातीतील हिंदू खाटीक समाज आर्थिक महामंडळाची स्थापना 5 जून 2025 रोजी महात्मा फुले मागासवर्ग विकास महामंडळा अंतर्गत उपकंपनी म्हणून करण्यात आली आहे.  हिंदू खाटीक समाज आर्थिक महामंडळ मर्या. (उपकंपनी) मार्फत हिंदू खाटीक समाजातील लोकांच्या आर्थिक व सामाजिक उन्नतीच्या उद्देशाने त्यांच्या सर्वांगीण विकासासाठी स्वयंरोजगाराच्या विविध कर्ज योजना राबविण्यात येत असल्याची माहिती महात्मा फुले मागासवर्ग विकास महामंळाचे जिल्हा व्यवस्थापक  व्ही.आ. आरेनवरू यांनी दिली.

             50 टक्के अनुदान योजना :- प्रकल्प मर्यादा रु. 50,000/- पर्यंत, मर्यादेच्या 50 टक्के जास्तीत जास्त 25,000/- पर्यंत अनुदान देण्यात येते. उर्वरित रक्कम बँकेमार्फत देण्यात याते. बँक कर्जावर बँकेच्या नियमाप्रमाणे व्याज आकरण्यात येते. कर्जाची परतफेड सर्वसाधारणपणे 3 वर्षात करावयाची आहे.

            बीज भांडवल योजना :- प्रकल्प मर्यादा रु. 50,001/- ते रु. 5,00,000 पर्यंत. प्रकल्प मर्यादेच्या 20 टक्के बीजभांडवल कर्ज महामंडळामार्फत 4 टक्के द.सा.द.शे व्याजदाराने दण्यात येते. या राशीमध्ये महामंडळाचे अनुदान प्रकल्प मर्यादेच्या 50 टक्के किंवा जास्तीत जास्त 50,000 पर्यंत समावेश आहे. बँकेचे कर्ज 75 टक्के देण्यात येते. या कर्जावर बँकेच्या नियमाप्रमाणे व्याजदर आकरण्यात येते, महामंडळाचे व बँकेच्या कर्जाची परतफेड एकाचवेळेस ठरवून दिलेल्या समान मासिक हप्त्यानुसार 3 ते 5 वर्षाच्या आत करावी लागते. अर्जदारास 5 टक्के स्वत:चा सहभाग भरावयाचा आहे.

            थेट कर्ज योजना :- प्रकल्प मर्यादा रु. 1, 00,000/- पर्यत प्रकल्प मर्यादेच्या 50 टक्के किंवा जास्तीत जास्त 50,000 पर्यत अनुदान देण्यात येते. उर्वरित रक्कम रु. 50,000/- महामंडळामार्फत 4 टक्के द.सा.द.शे व्याजदाराने देण्यात येते. कर्जाची परतफेड सर्वसाधारणपणे 3 वर्षात करावायची आहे.

             एनएसएफडीसी योजना: प्रकल्प मर्यादा  1,40,000 पर्यंत, एकूण प्रकल्पाच्या 90 टक्के एनएसएफडीसी, नवी दिल्ली यांच्या मार्फत प्राप्त होणार, जास्तीत जास्त रु. 50,000/- च्या कमाल मर्यादेत अनुदान आहे. उर्वरित रक्कम बीजभांडवल स्वरुपात देण्यात येईल. अर्जदाराचा कोणत्याही स्वरुपात उल्लेख नाही.

             अर्ज करण्यास आवश्यक पात्रता:- अर्जदार अनुसूचित जातीतील हिंदू खाटीक संवर्गातील असावा. त्याचे वय 18 वर्षापेक्षा जास्त असावे. राज्य महामंडळाच्या योजनेकरिता वार्षिक उत्पन्न मर्यादा शहरी व ग्रामीण भागाकरीता रु. 3 लाख इतकी आहे. अर्जदार हा महामंडळाच्या कोणत्याही योजनांचा (राज्य/ केंद्र) थकबाकीदार नसावा.

अर्ज करण्यास आवश्यक कागदपत्रे :-

  जातीचा व उत्पन्नाचा सक्षम अधिकाऱ्यांनी दिलेला दाखला. पासर्पाट छायाचित्र 3, रेशनकार्ड, मतदान ओळखपत्र, रहिवासी प्रमाणपत्र, आधारकार्ड प्रत, पॅनकार्ड, कोटेशन, व्यवसायासाठी आवश्यक असल्यास जागेचा पुरावा, व्यवसायानुरूप इतर आवश्यक दाखले. आवश्यकतेप्रमाणे प्रकल्प अहवाल. व्यवसायनुरूप आवश्यकतेप्रमाणे इतर दाखले उदा, वाहनाकरीता व इतर व्यवसायाकरीता लायन्सस, परमिट, बॅच नंबर इ. बँकेचे खाते क्रमांक व पासबुक ची झेरॉक्स प्रत सादर करावेत.