देवगड
पेण येथे झालेल्या अपघातात देवगड येथील स्पृहा खवळे (वय २४) ही विवाहिता जागीच ठार झाली आहे. तर तीचा पती सुमित हा गंभीर जखमी झाला आहे. हा अपघात आज पहाटे साडेचार वाजेच्या सुमारास मुंबई-गोवा महामार्गावर घडला. हे दोघेही पती-पत्नी मुंबई येथे आंबे घेऊन विक्रीसाठी जात होते.
याबाबत अधिक माहिती अशी की, देवगड-तारामुंबरी येथील खवळे दांपत्य महिंद्रा पिकअप टेम्पो मधून आंबे घेऊन मुंबईला जात असताना मुंबई-गोवा महामार्गावर पेण तालुक्यातील हमरापुर फाटा हद्दीत गॅस सिलेंडर वाहून नेणाऱ्या ट्रकला महिंद्रा बोलेरो पिकअपची जोरदार पाठीमागून धडक बसून अपघात झाला. हा अपघात पहाटे साडेचार वाजण्याच्या सुमारास झाला.
या अपघातात बोलोरो पिकअप मधून प्रवास करणाऱ्या सुमित चंद्रकांत खवळे (वय २८, रा. देवगड-तारामुंबरी) हे गंभीर जखमी झाले आहेत. तर त्यांची पत्नी स्पृहा सुमित खवळे (वय २४) ही जागीच ठार झाली. गॅस वाहतूक करणाऱ्या ट्रकला बोलेरो पिकअपची पाठीमागून इतक्या जोराने धडक बसली की बोलेरोच्या समोरील भाग ट्रकच्या मागील बाजूने आत घुसल्याने बोलेरो मधील पती-पत्नी हे दांपत्य आत अडकुन पडले. यात सुमित खवळे गंभीर जखमी झाले . तर त्यांची पत्नी दोन्ही वाहनांमध्ये चिरडल्याने जागीच ठार झाल्या आहेत.
अपघाताचे वृत्त कळताच कल्पेश ठाकूर हे देवदूत बनवून आले व त्यांनी तात्काळ अपघातग्रस्तांना आपल्या रुग्णवाहिकेतून तात्काळ पेण उपजिल्हा रुग्णालयात दाखल केले.
