मुंबई (गुरुदत्त वाकदेकर) :
महिला प्रीमियर लीगच्या पहिल्या हंगामाच्या अंतिम सामन्यात मुंबई इंडियन्सने दिल्ली कॅपिटल्सचा सात गडी राखून पराभव केला. हरमनप्रीत कौरच्या संघाने पहिल्या हंगामाचे विजेतेपद पटकावत आश्चर्यकारक कामगिरी केली. ब्रेबॉर्न स्टेडियमवर दिल्ली कॅपिटल्सची कर्णधार मेग लैनिंगने नाणेफेक जिंकून प्रथम फलंदाजी करण्याचा निर्णय घेतला. दिल्लीने २० षटकांत नऊ गडी गमावून १३१ धावा केल्या. प्रत्युत्तरात मुंबईने १९.३ षटकांत तीन गड्यांच्या मोबदल्यात १३४ धावा करून सामना जिंकला.
इंग्लंडची अनुभवी खेळाडू नताली सीवर ब्रंटने महिला प्रीमियर लीगच्या पहिल्या सत्रात मुंबई इंडियन्सला चॅम्पियन बनवले आहे. तिने ५५ चेंडूत नाबाद ६० धावा करत सांघिक विजेतेपद पटकावले. मुंबई संघ मालकांच्या खात्यातला हा सहावा चषक आहे. मुंबईच्या पुरुष संघाने आयपीएलमध्ये ही कामगिरी पाच वेळा केली आहे.
नतालीने अमेलिया केरसोबत चौथ्या विकेटसाठी २० चेंडूत नाबाद ३९ धावांची भागीदारी केली. अमेलिया केर आठ चेंडूत १४ धावा करून नाबाद राहिली. नतालीने याआधी कर्णधार हरमनप्रीत कौरसोबत तिसऱ्या विकेटसाठी ७४ चेंडूत ७२ धावांची भागीदारी केली होती. हरमनप्रीत ३९ चेंडूत ७ धावा करून बाद झाली. हिली मॅथ्यूजने १३ आणि यास्तिका भाटियाने चार धावा केल्या. दिल्लीकडून राधा यादव आणि जेस जोनासेन यांनी प्रत्येकी एक विकेट घेतली.
दिल्ली कॅपिटल्सबद्दल बोलायचे झाले तर एके काळी त्याच्या नऊ विकेट ७९ धावांत पडल्या होत्या. संघाला १०० धावांचा टप्पाही गाठता येणार नाही, असेच वाटत होते. तेव्हा शिखा पांडे आणि राधा यादवने डाव सावरला. दोघींनी शेवटच्या विकेटसाठी २४ चेंडूत नाबाद ५२ धावांची भागीदारी केली. राधाने १२ चेंडूत नाबाद २७ तर शिखाने १७ चेंडूत नाबाद २७ धावा केल्या. राधाने आपल्या खेळीत दोन चौकार आणि दोन षटकार मारले. त्याचवेळी शिखाच्या बॅटमधून तीन चौकार बाहेर पडले. तिने एक षटकारही मारला.
दिल्लीच्या दिग्गज फलंदाजांनी या सामन्यात निराशा केली. कर्णधार मेग लैनिंग वगळता कोणीही जास्त वेळ खेळपट्टीवर टिकू शकले नाही. मेग लैनिंगने २९ चेंडूत ३५ धावा केल्या. ती दुर्दैवाने धावबाद झाली. मरिजान कैपने १८ आणि शफाली वर्माने ११ धावांचे योगदान दिले.
मुंबई इंडियन्सकडून इस्सी वोंग आणि हिली मॅथ्यूज यांनी प्रत्येकी सर्वाधिक तीन बळी घेतले. मात्र, इस्सी वोंगने चार षटकांत ४२ धावा दिल्या. त्याचवेळी मॅथ्यूजने चार षटकांत केवळ पाच धावा दिल्या आणि दोन मेडन षटके केली. इस्सी वोंगने दिल्लीच्या टॉप ऑर्डरला खिंडार पाडले, तर मॅथ्यूजने तळाच्या फलंदाजांना गुंडाळले. या दोघींशिवाय अमेलिया केरनेही दोन महत्त्वाचे बळी घेतले.
महिला प्रीमियर लीगच्या अंतिम फेरीत मुंबई इंडियन्सने दिल्ली कॅपिटल्सचा पराभव करत विजेतेपद पटकावले. मुंबईतील ब्रेबॉर्न स्टेडियमवर उभय संघांमधील सामना रंगला. हा सामना जिंकणारा संघ श्रीमंत झाला आहे. चषकाबरोबरच मुंबई संघाने बक्षीस म्हणून ६ कोटी रुपयेही घरी नेले. उपविजेत्या दिल्ली कॅपिटल्सला ३ कोटी रुपये मिळाले.
आयपीएलच्या तुलनेत महिला प्रीमियर लीगमध्ये बक्षीस रक्कम खूपच कमी आहे. गेल्या वर्षी आयपीएल चॅम्पियन बनलेल्या गुजरात टायटन्सच्या संघाला बक्षीस म्हणून २० कोटी रुपये मिळाले होते. त्याचवेळी उपविजेत्या राजस्थान रॉयल्सला १२.५ कोटी रुपयांचा धनादेश मिळाला.
*पुरस्कारांची यादी:-*
पॉवरफुल स्ट्रायकर ऑफ द मॅच (सन्मानचिन्ह आणि एक लाख रुपये): राधा यादव
सामनावीर (सन्मानचिन्ह आणि २.५ लाख रुपये): नताली सीवर ब्रंट
पॉवरफुल स्ट्रायकर ऑफ द सीझन (सन्मानचिन्ह आणि ५ लाख रुपये): सोफी डिवाइन
हंगामातील उदयोन्मुख खेळाडू (सन्मानचिन्ह आणि ५ लाख रुपये): यास्तिका भाटिया
फेअरप्ले पुरस्कार: मुंबई इंडियन्स आणि दिल्ली कॅपिटल्स
कॅच ऑफ द सीझन पुरस्कार (सन्मानचिन्ह आणि ५ लाख रुपये): हरमनप्रीत कौर
एका मोसमात सर्वाधिक विकेटसाठी पर्पल कॅप (कॅप आणि ५ लाख रुपये): हिली मॅथ्यूज
एका मोसमात सर्वाधिक धावांसाठी ऑरेंज कॅप (कॅप आणि ५ लाख रुपये): मेग लॅनिंग
मोस्ट व्हॅल्युएबल प्लेअर ऑफ द सीझन (सन्मानचिन्ह आणि ५ लाख रुपये): हिली मॅथ्यूज
