हाथरस प्रकरणाच्या तपासासाठी नेमलेल्या विशेष चौकशी पथकातील (एसआयटी) पोलीस अधिकाऱ्याच्या पत्नीने आत्महत्या केली आहे. उन्नाव येथील पोलीस प्रशिक्षण केंद्राचे डीआयजी चंद्र प्रकाश यांच्या पुष्पा देवी वय (३६) या पत्नी होत्या. काल शनिवारी लखनऊमधील सुशांत गोल्फ सिटी येथील घरात त्यांनी गळफास घेऊन आत्महत्या केली, अशी माहिती पोलिसांनी दिली. मिळालेल्या माहितीनुसार, चंद्र प्रकाश हे हाथरस येथील बलात्कार प्रकरणाच्या चौकशीसाठी स्थापन केलेल्या एसआयटीमधील सदस्य आहेत. पोलीस अधिकाऱ्यांनी दिलेल्या माहितीनुसार, पुष्पा देवी यांचा मृतदेह घरातील पंख्याला लटकलेल्या अवस्थेत आढळून आला. घरात कोणतीही सुसाइड नोट सापडलेली नाही. या घटनेचा तपास सुरू आहे.
चंद्र प्रकाश हे उन्नाव पोलीस प्रशिक्षण केंद्रात कार्यरत आहेत. पत्नी पुष्पा प्रकाश यांच्यासह दोन मुली आणि एक मुलगा आहे. शनिवारी चंद्र प्रकाश हे कामानिमित्त घराबाहेर पडले होते. काही वेळानंतर पुष्पा यांनी त्यांना फोन केला. ‘मी जात आहे,’ असे त्यांनी चंद्र प्रकाश यांना सांगून फोन ठेवून दिला. पत्नीच्या फोननंतर डीआयजी चंद्र प्रकाश यांच्या पायाखालील जमीन सरकली. त्यांनी फोनवरून संपर्क साधण्याचा प्रयत्न केला मात्र, फोन उचलला नाही. त्यांनी तात्काळ घरी धाव घेतली. घरी पोहोचल्यानंतर तळमजल्यावर मुले आणि नोकर होते. पत्नी पहिल्या मजल्यावरील खोलीत होती. त्यांनी दरवाजा ठोठावला, पण प्रतिसाद मिळाला नाही. अखेर त्यांनी दरवाजा तोडला. आतमध्ये बघितले तर, पुष्पा देवी यांनी गळफास घेऊन आत्महत्या केली होती. त्यांचा मृतदेह पंख्याला लटकलेल्या अवस्थेत होता.
