जागतिक साहित्य कला व्यक्तित्व विकास मंच सदस्य लेखक कवी हेमंत कुलकर्णी यांची अप्रतिम अभंग रचना

*(काव्यप्रकार—अभंग)*

यंदाच्या वारीला। येतो बा विठ्ठला।
निश्चय तो केला। ठरविले।।१।।

केली सर्व सिद्धी। तपासली यादी।
निरोपासी सादी। पुत्रपौत्रा।।२।।

सूचना करूनी। कामांची वाटणी।
लेकी सुना आणि। मंडळीसी।।३।।

सुखे जावे आता। करू नये चिंता।
मज आश्वासिता। धास्तावलो।।४।।

कट कारस्थान। रची थोर सान।
हेमंते नमन। येथुनची।।५।।

—हेमंत कुलकर्णी,
मुलुंड, मुंबई.